Jowai, Risaw 06
Ka jingïakynduh lang jong ki nongïalam ka Dorbar Shnong Lapangap bad ki nongïalam jong ka Socheng Amreng Border Development Committee (SABDC) ban pynbeit ïa ka jinghuri hura hapdeng ki Lapangap bad ki Tahpat ka la pulom noh namar ka jingïapyneh triang jong baroh ki ar liang mamla.
Kumba yn shu pyn-kynmaw, ki nongshong shnong Karbi ki la pynthut ïa ki nongshong shnong Lapangap ha ka por ba ki leit ot kba hadien ba ki nongshong shnong Lapangap ki la pynjulor ïa ki jingthung dieng.
Ïa katei ka jingïakynduh lang la pynbeit da ki bor pynïaid district jong ka West Karbi Anglong District Assam bad ka West Jaiñtia Hills District, Meghalaya ha BOP jong ki pulit Assam ha shnong Khanduli, West Jaiñtia Hills District ha ka 6 tarik Risaw.
La wan mih khmat da u Waheh Shnong Lapangap u Ma Deimonmi Lyngdoh lem bad saw ngut ki dkhot shnong katba na ka liang jong ka SABDC la wan da mih khmat u Augustine Hanse bad 30 ngut kiwei.
Ha katei ka jingïalang la don ryngkat u DC bad SP jong ka West Karbi Anglong District bad ka ADC bad SP jong ka West Jaiñtia Hills District lem bad kiwei de ki heh ophisar.
Ki nongïalam Shnong jong ka Lapangap ki la pynpaw ïa ka jingsngewkhia jong ki halor ka jingbym ïoh lad jong ki, ban ot kba noh haduh mynta bad lada kim ïoh ot noh hapoh shi taïew ne ar taïew te u kba un sa julor noh.
Katba na ka liang jong ki nongïalam jong ka SABDC ki la buh lai tylli ki kyndon kata ban shah ïa ki ban thung dieng biang, ban register ki jaka puta sha Assam bad ban shah ban thung maw pud maw sam, shwa ba kin shah ïa ki Lapangap ban ot kba da ka jingsuk khlem jingpynthut.
