Shillong, Risaw 06
Ka Shillong Lajong FC ka la wanphai biang sha ka kyrdan ba hakhlieh ha ka lympung ïalehkai Shillong Premier League, hadien ba ka la lah ban pynliem ïa ka Sawmer SC da 4-0 kol ha ka lah sngi U Blei ha SSA Stadium kaba ha First Ground, Polo.
Kane ka la wan urlong lyngba u Banlam -kupar Rynjah (45+3), Emanbha Marbaniang (67), Ïohborlang L Lyngkhoi (71) bad u Franky Dkhar (84) kaba la pynlong ïa ka SLFC ban kamai 15 poiñ bad ban ïa ryngkat bad ka Mawlai.
Ha kaba sdang ka Sawmer ka la pyrshang ban ïalehkai bha ha ka bynta kaba shadien, da kaba pynshong nongrim bha ïa la ka jong ka jingkhlaiñ bad tlot ha la ka jong ka kynhun. Hynrei ha ka minit ba 20 u Jeffrey Jyrwa u la lah ban kyrda ïa ka free-kick kaba la khyrwit lyngba u Ïohborlang, pynban shwa ba ka jingïakhun kan jam sha ka jingïashong thait ba u Banlamkupar u la ïoh ïa ka kabu ban pynkhih ïa ka jar naka bynta ka Shillong Lajong.
Haba wan ban bteng ïa ka kylla miet, ki khynnah ka Lajong ki la sdang ban kham pynsted bad tehla-kam bha ïa ka jingïakhun, da kaba ki la sdang ban kham ñion bha ïa ka kut ïalehkai ka Sawmer, kaba hangne, u rangapkol ka Sawmer u la ïeng ïada ïa la ka jong ka kol, hynrei hapdeng ka jingshah ïai ñion kaba na ka por sha ka por, ka plie lad ïa ka Lajong ba kan bteng ba kan ïoh pat ba kan thep sa ïa ki kol kiba sah jong ka.
Haba phai sha ka kynhun ïalehkai ka Sawmer, ka sngewthuh ba kam long kaba suk ïa ka ha kane ka jingïakhun pyrshah ïa ka Lajong, pynban kaei kaba ka lah ba kan pynpaw hi ka long tang ba kan shu kham lah pat ban kham ïakhun tyngeh bad kiwei pat ki kynhun kiba lam ïaryngkat bor lang bad ka, kaba da kane ka nam rem kaba mynta ka sngi, ka la ïai neh ha ka kyrdan kaba san hadien ba ka la ïoh 9 point.
Ha ka sngi Ba-ar, kan dei kawei na ki jingïakhun ka ban itynnad bad kaba ïakhaid bha hapdeng ka Nangkiew Irat SC pyrshah ïa ka Langsning FC, kaba na kane ka jingïakhun, ka Shillong Lajong ne ka Mawlai kin peit ïa kaei ka ban jia ne ka ban mih.
Ka Nangkiew Irat kan rung sha kane ka jingïa-khun hadien ba ka la ïoh ban khur 13 point, katba ka Langsning FC ka don ha ka kyrdan ba saw hadien ba ka la ïoh 11 point, kane ka jingïakhun kan sdang ha ka por 4:30 nohphai sngi.
