UK, Risaw:
Ki pulit ki la iathuh ha ka Sngi U Blei ba ki dang tohkit ïa ki katto- katne ngut haba ïadei bad ka jingshah thang jong kawei ka jakamane Muslim kaba don ha ka thaiñ Shatei Lam Mihngi jong ka England kum ka “jingleh be-ijot”, katto katne sngi hadien ka jingshah thombor kaba shyrkhei ha kawei ka sinagog.
La ong ba ki heh pulit ki la leit poi sha katei ka jingjia kaba don ha ka shnong Peacehaven kaba don sha ka thaiñ Shatei Lam Mihngi jong ka duriaw jong ka Peacehaven ha ka Sngi Saitjaiñ.
Hynrei la ong ba ym shym la ioh jingtip ban don mano- mano ba mynsaw, ka jingpluh ka la pynjulor ia ka jingkhang ba shakhmat jong katei ka jaka mane ‘mosque’ bad ïa kawei ka kali kaba ieng habar jong katei ka jaka mane.
Hadien katei ka jingshah thombor, ki pulit jong ka Sussex, ki la pynsaphriang ïa ki dur jong ki 2ngut ki suba don kti kiba la kah dur, kiba phong da ki jaiñ kiba dum bad ki la kyrpad jingïarap na ki paidbah, ban ithuh ïa ki.
U nongtohkit, u Gavin Patch u la ai kyrteng ïa katei ka ding kum ka “jingshah thombor kaba shyrkhei bad kaba khlem jingsuitñiew ïa ki mynsiem briew.
“Ngi shim ïa kane, kum ka kam thombor da ka jingthmu ban buh jingma ïa ka jingim ki riew paidbah bad ngin dang bteng ban bud-dien ïa ki katto- katne ki jingtohkit ban lap ïa kiba donkti halor kane ka kam,” la ong u Patch.
Katei ka jingpluh, ka long hadien ka jingshah thombor ha ka Sngi Palei, ha kawei ka Synagog, ha ka nongbah Manchester, kaba don sha ka phang Shatei Lam Mihngi, ha kaba arngut ki briew, ki la ïap bad lai ngut kiwei pat ki la mynsaw jur, ha kaba ki ophisar, ki la shim ïa ka jingïadei kaba lah ban don bad ka jingleh donbor jong ki Islamist.
U nongaiktien jong ka Peacehaven mosque u la ong “ngi sngewnguh shibun eh ba ym shym la don mano mano ba mynsaw”, da kaba khot ïa “baroh ban kyntait ïa ka jingïapher bad ban jubab ïa ka jingshun da ka jingïatylli bad jingsngewrit”.
U Myntri kam pohïing u Shabana Mahmood u la ong ba katei ka jingshah thombor ka long kaba sngewkhia bha.
“Ki jingthombor pyrshah ïa ki Muslim jong ka Britain, ki dei ki jingthombor pyrshah ïa baroh ki nong Britain bad ïa kane ka ri hi”, la bynrap biang u Mahmood ha ki social media.
U Phil Rosenberg, President jong ka Board of Deputies jong ki Jiw jong ka ri Bilat, u la pynrem ruh ïa ka jingpluh jong ka mosque, da kaba kyrpad ïa ka jingïatylli kaba kham khraw.
