Shillong, Risaw 07
Ka Sorkar Jylla ka la pynbna ban bhah 93 tylli ki ‘seat’ MBBS hapoh jong ka ‘Central Pool Quota’ na ka bynta ka samoi-pule 2025-26.
Ïa kane ka thup kyrteng la pyllait hadien ba la khmih bniah ïa ki jingsngewkhia ba la pynpaw da ka Khasi Students’ Union (KSU) ha kaba ïadei bad ki jingkynnoh bym biang ha ka rukom ai bhah ïa ki ‘seat’.
Na ki 93 tylli ki ‘seat’, la mang ïa 14 ngut ha ka thup kyrdan ‘Unreserved Category’, 37 ngut ha ka ‘Khasi-Jaiñtia’, 37 ngut ha ka ‘Garo’, bad 5 ha ka OST/SC. Nalor kata, la buh ruh ïa 35 ngut kiwei pat ki kyrtong ha ka thup ‘Waiting List’.
Katkum ka hukum ba la pynmih da ka Joint Secretary ka tnad ka koit ka khiah, Dr. Rezina Ch Marak ha ka Sngi Ba-ar, la pynmih ïa ka thup kyrteng ha ka jaka (jong kawei pat) bad ka jingbuddien ïa ki ‘Minutes’ jong ka jingïalang kaba la long ha ka 6 tarik u Risaw.
Kumba ka paw, kawei ka kyrtong, ka Tanuska Chakravorty, ha kaba nyngkong la ai jaka ha ka kyrdan ‘Unreserved Category’ hynrei la pynkynriah noh sha ka ‘Waiting List’ hadien ka jingkhmih bniah.
Ha ka 3 tarik u Risaw, ka Sorkar Jylla ka la pynsangeh noh shuwa ban pdiang kyrteng na ka bynta ki jingpule MBBS hapoh jong ka ‘Central Pool Quota’ hadien ka jingpyrshah jong ka KSU.
Ka seng ha ka jingïakynduh bad u Myntri ka tnad ka koit ka khiah, u Bah Wailadmiki Shylla ha ka Lah Sngi U Blei ka la kdew ba ka kam ba ïadei bad ka rukom jied kam don ïa ka jingshai bad kam ïaid katkum ka jingïoh ‘marks’, ha kaba ïa ki samla pule kiba kham duna ‘marks’ la pynrung ha ka thup kyrdan ‘Open (Unreserved) Category’ katba ïa ki samla pule Khasi kiba kham heh ‘marks’ ki la shah kyntait.
Ka KSU ka la dawa ban weng noh ïa ka ‘Clause 9.6’ na ka Standard Operating Procedure (SOP), ha kaba ki samla pule ki hap ban jied hapdeng ka ‘Open Category’ bad ka ‘Scheduled Tribe Category’ (ST). Ka la kynthoh ba kane ka kyndon ka long ka bym shai bad ka pynduh ïa ki samla pule ïa ka jaka kaba dei hok jong ki ha ka ‘Open Category’.
Ha kawei ka liang, ki kyrtong kiba la shah jied na ka bynta kane ka ‘Course’, la bthah ba kin leit mih sha ka tnad ka Koit ka Khiah, kamra 502, Additional Building jong ka Meghalaya Secretary, ha ka 7, 8 bad 9 tarik Risaw hashuwa ka por 5 baje janmiet na ka bynta ban pdiang ïa ka ‘Course’ bad ban pyndep ïa ka jingïateh kular ne ka ‘bond-cum-agreement’. Ki kyrtong ki dei ban wanrah ïa saw tylli ki dur (passport) bad ka ‘Aadhaar Card’ jong ki.
Ki kyrtong ba la shah jied ki bym wan katkum ka tarik ba la buh kumba la kdew haneng kin duh noh hi dalade ïa ka hok ban shah jied bad yn sa jied noh ïa u/ka kyrtong kiba biang hadien.
Ki kyndon & jingpynbeit kumba la kdew ha ka jingpynbna ne ki jingpule bad kiwei-kiwei, kin long kiba teh bad kiba hap ban bud ryntih, la ong ka hukum.
