Shillong, Risaw 07
Kum ka lad ban ïoh jingtip halor ka jingdon jong ki ‘wine store’ kiba la pynïeng ha shilynter ka surok bah kaba naduh na Khanapara shaduh Malidor, na ka liang ka Hynñiewtrep Integrated Territorial Organisation (HITO), ka la wad jingtip lyngba ka Right To Information (RTI) na ka ophis treikam u Commissioner of Excise.
Hadien ba la ïohpdiang ïa ka jubab, ka seng ha ka 7 tarik u Risaw 2025, ka la wan ha Shillong Press Club ban pynbna paidbah ïa ka jingdon ki dukan die kyaid ha kitei ki surok bah.
Haba kren sha ki lad pathai khubor, u Bah Wanbun N Dkhar, General Secretary u la ong ba lyngba ka RTI, la ïoh jingtip ba ha ka thaiñ Ri-Bhoi ki don haduh 78 tylli ki ‘wine store’, ha ka thaiñ East Jaiñtia Hills, 35 tylli bad ha West Jaiñtia Hills 13 tylli bad haba kheiñ kyllum, kine ki ‘wine store’ kiba la pynïeng ha shi lynter ka surok bah ki don haduh 126 tylli. Da kaba pynpaw ba kine baroh ki long kiba be-aiñ.
U la ong ba ha u snem 2017, ka Ministry of Road Transport and Highway ka la pynmih ïa ka hukum ban khang noh ïa ki ‘wine store’ kiba don ha ki surok bah bad kumjuh ruh ka Supreme Court ha u snem 2016, ka la pynmih ïa ka hukum ban khang noh ïa ki ‘wine store’ ba don ha ki surok bah, hynrei kaba phylla ba ha kane ka Jylla pat ki dang don.
U la ong ba ha kine ki dukan die kyiad ki buh da ki ‘sign board’, ba thoh ‘Shop Open’ kaba long kum ban da rapjot ne ban tap eit miaw ïa ka hukkum ba la pynmih da ka tnad Road Transport and Highway.
Nalor kata, ka seng ka ai por 30 sngi ïa ka Sorkar Jylla lyngba ka tnad excise, ba kan pynshai halor ka jingdon kitei ki ‘wine store’ ha ki surok bah.
