Shillong, Risaw 07
Ka Central Bureau of Investigation (CBI) ka la kem ïa ki 3 ngut ki nongtrei jong ka Postal Department ba kynthup ïa u Assistant Branch Post Master bad u Sub-Division Inspector jong ka Williamnagar ha East Garo Hills bad ïa u Postman ka Rongjeng Sub Post Office halor ka kam bamsap.
Katkum ka khubor, ka CBI ka la register case pyrshah ïa kitei ki 3 ngut ha ka 4 tarik mynta u bnai halor ka jingujor kaba la ïoh na u Gram Dak Sevak, Block Post Master ka Rongjeng Sub-Office ha East Garo Hills ba kite ki lai ngut ki la dawa pisa na ka tulop kaba ar bnai na utei u nongujor na ka bynta ban pyllait ïa ka tulop kaba la bat bad pynsahkut da ka Postal Department la 10 bnai kynthih.
La ong ba ka CBI ka la ïoh jingtip ba kine ki briew hadien ka jingïapynbeit ki la mynjur ban shim ïa ka pisa kaba long T.30 hajar bad bthah ïa une u nongujor ba siew ïa kane ka pisa dawa bamsap hadien mar ïa pyllait ïa ka tulop jong u.
Halor kane, na ka liang jong ki CBI ki la pynlong da ka jingpynap shrip bad ïoh ban kem noh ïa u Assistant Branch Post Master ka Williamnagar markhmat katba u dang kner ki kti ban shim ïa ka pisa kaba long T.30 hajar. Kham hadien la ïoh ban kem noh sa ïa u Sub-Division Inspector na Shillong bad ïa u Postman na Ambassa kaba hap ha Dhalai District jong ka Tripura ha ka 7 tarik mynta u bnai.
Hadien kane, na ka liang jong ki CBI ki la pynlong ïa ka jingkhynra ha ophis bad ïa ka ïingsah jong kine ki nongtrei ha Williamnagar bad kumjuh ruh ha shnong Upanagar ha Tripura ha kaba la ïoh ban kurup noh ïa ki kot ki sla kiba donkam bad ruh ban kurup ïa ka pisa kaba long T.2.30 lak na ka ïingsah jong u Postman kaba don ha Tripura.
Ïa kine ki lai ngut kiba la ïoh kem yn sa leit rah hakhmat ka ïingbishar. Ka jingtohkit mynta ka la ïaid shakhmat.
