Shillong, Risaw 07
U Dalton Marak, IPS, Chairman ka Recruitment Board (CRB) u la ong ba ka Board kan sa pyllait noh shen ïa ka result jong ka ‘written test’ na ka bynta kito ki samla ba la ïakhun ïa ka exam Meghalaya Police Recruitment 2025.
Haba kren sha ki lad pathai khubor, u Dalton Marak u la ong ba ka jingpynkhreh ban pyllait ïa ka resol ka la ïaid shaid-shaid.
U la ong ba ka jingthmu hi ka long ban pynmih ha ka taïew ba nyngkong jong u bnai Nailur, hynrei kadei namar ka jingpynslem ka kompani ba peit ïa kane, kumta u kyrmen ba hapoh u ne u bnai ne ha u bnai ban wan, yn sa pyllait noh ïa ka resol, khnang ban ïaid shakhmat ïa ka interview na ka bynta kito kiba shah jied.
“Kumba 54,000 hajar ngut ki kyrtong kiba ïakhun ïa ka ‘written test’ bad ka jingkheiñ ïa ki ‘marks’ ka dang ïaid shaid-shaid mynta,” la ong u Dalton Marak.
U Dalton Marak u la ïathuh, “Nga la batai ha ki samla nongïakhun ba ha kane ka jingthung kam, ngi la ïoh pdiang haduh 1.72 lak ngut ki aplikeshon ha kaba haduh 1.28 lak ngut ki la ïa shim bynta ha ka Physical Efficiency Test (PET) bad kiba wan ban leh ïa ka ‘Written Test’ ki don satang 54,000 hajar ngut. Mynta ka kompani kaba pynïaid ïa ka ‘written test’, ka dang pynkhreh ïa ka resol”
“Ki kwah ban tip ïa baroh kine kiei-kiei bad kumta ngi la batai ha ki bad la paw kumba ki la hun ïa ka jingbatai. Lada don mano-mano ba dang artatien ne don jingkylli ban kylli halor kane ka jingthung kam, phi long kiba pdiang ban wan sha ka ophis ka CRB ban ïakynduh ïa nga ha Police Headquarter,” u la bynrap.
U Chairman ka CRB u la ong ruh ba ka rukom pynïaid ïa kane ka jingthung kam ka long kaba khuid bad ba shai, bad kam don ka jingleh shilliang khmat.
Kat kum ka jingong jong u, ki don haduh lai tylli ki kopi jong ka OMR sheet- kawei ka copy ka don bad ka kompani ba kan kheiñ ïa ki ‘marks’ jong ka ‘written test’, kawei ka kopi ka don bad ka CRB bad kawei pat kan leit sha ki kyrtong.
