Shillong, Risaw 07
Ka Khasi Student’s Union (KSU) ka kyntu sha baroh ki nongmihkhmat ka bri u hynñiewtrep ba kim dei ban shu ïohi tang na shynrong lyngba ka jingpynthame kiwei ki ar halor ka lynti rel.
Ha ka kyrwoh khubor ba la pyllait da u General Secretary ka KSU Sengkmie u samla Donald V Thabah u la ong ba ka KSU ka sngew ba kum ki nongmihkhmat ki dei ban peit bniah ban ïohi shynna ïa ki jingma kiba bun jait kiba ap na ka jingwan ka lynti rel ha ka bri u hynñiewtrep bad kaba kongsan eh ka dei ka jingwan buhai shnong kiba nabar hapoh ka bri u hynñiewtrep.
U la ong, lada wan ka lynti kaba ki ong ban kit tang ka mar bam, kam eh hadien ban poi suk ka rel kit briew namar la don lypa ka lynti ïaid. “Ban pynskhem ïa kane ngin hap phai shadien ha ki por u Pa’iem Tirot Sing ba kumno lyngba ka surok ka East India Company ka synshar da ka bor ïa ka Ri Khasi,” u la ong.
“Ngi hap ban sngewthuh shai ba ka Jylla Meghalaya ka dang duna shibun ki aiñ ban tehlakam ïa ka jingrung laitlan ki briew kiba nabar bad kumjuh ruh ban pynneh la ka dustur ka riti bad ban long trai ha ka khaïi ka pateng ha ka khyndew ka shyiap,” ong u samla Donald.
U la ong ba ka KSU lyngba kane ka kyrwoh ka kwah ban buh jingkylli ruh ba balei duna palat ki nongmihkhmat na ka jaidbynriew ki ban ïakhun tyngeh na ka bynta ka ILP lane wat tang ban kren halor ka ILP lada dei ha ki rynsan Sorkar bapher-bapher lane ha ki lad pathai khubor. Ka KSU ka kwah jingpynshai ruh hato la don mano-mano ki MLA kiba ju leit ban dawa ïa ka ILP na ka Sorkar Pdeng ha Delhi? Shuh-shuh katno tylli ki jingthoh lane ki resolution ka Sorkar Jylla ka la phah sha ka Sorkar Pdeng halor ka jingkwah ILP ki paid nongshong shnong ka Jylla? Hato ki MLA kim dei ban thrang ILP palat ban ïa kaba thrang lynti rel?
Kyntang ïa wai ka KSU ka pynbna ba kan ïakhun dohïap pyrshah ïa ka lynti rel katba ka jaidbynriew hi kam pat lah ban shong shngaiñ ha la ka jong ka Ri. Ha kajuh ka por ka kyntu ïa ki paradoh parasnam ba kin ym shah pynthame halor ka lynti rel hynrei ban pyrkhat shwa ïa ka lawei ka jaidbynriew khlem da ïa peiñ bad ka myntoi shimet.
