Liuyang, Risaw:
Katkum ki khubor, la ong ba katba dang pynbyrngia ia ki nongpeitkai da ka jingpynher kai ïa ki drone bad ki jingpynbthei bom shalor suiñ ha ka nongbah Liuyang jong ka China, ka la poi sha ka jingkulmar hadien ba kitei ki drone ki la leit hap bakla, ha kaba da ki phew tylli ki drone ki la pulom ka rukom treikam ha suiñbneng, kaba la wanrah ïa ki lyngkhot ding kiba la hap ha ki paidbah nongpeit kai bad ba ki paidbah ki la hap ban iaphet kulmar bad ban wad jaka rieh ban lait na kitei ki lyngkhot ding kiba hap na kitei ki drone kiba kem ding bad bthei shalor suiñ. Kane ka jingjia ka la jia ha ka 2 tarik jong u Risaw ha ka por ba pyni ia ka “October: The Sound of Blooming Flowers ” ha ka Sky Theatre, kaba la thmu ban pyni kai ia ka jingphylla jong ka juk ‘3D’ nalor suiñ. Hynrei ki jingthud ha ka liang ka rukom treikam ki la pynlong ïa ki drone ban her kulmar bad ban iatyngkhuh para ma ki halor suiñ, kaba la pynlong ia ki ban bthei bad buh jingma wat ia ki paidbah nongpeitkai kiba don ha katei ka jaka ha katei ka miet.
Katkum ki video ba la saphriang paidbah ha ki rynsan ‘Social media’, la iohi ia ki briew ba ki hap ban pyndonkam da ki shuki ban kah kum ka jingda ialade na kitei ki ding kiba hap shapoh madan na kitei ki drone kiba bthei bad pra, katba don pat kiwei kiba la ia mareh lymwir ban wad jaka rieh katba ki lyngkhot ding kiba la bthei na kitei ki drone ki nang hap nalor suiñ.
Haba iadei bad kane, ki heh sorkar ki la pyntikna ba ym shym la don kino- kino kiba ngat ne mynsaw ha katei ka jingjia ha katei ka miet bad la pyntikna ruh ba ym shym la don kano- kano ka jingjia kaba sngewsih na katei ka jingbthei ki drone ha katei ka sngi.
