Shillong, Risaw 07
Ki paid nongshong shnong ka thaiñ Umroi, kila ai ka jingkyrshan ïa ka projek ban pynheh ïa ka kad liengsuiñ ha Umroi-ka Shillong Airport, ha ka public hearing ba la long ha ka sngi Ba-ar.
Watla ki nongïalam shnong kila pynpaw ba ki ai ka jingkyrshan ba pura ïa ka projek, kila pynpaw pat ïa ka jingsngewkhia haba ïadei bad ka lad ïohkam ïohjam ïa ki trai shnong.
Haba kren sha ki lad pathai khubor, u Director jong ka Shillong Airport u Rajeev Rajan u la pyntip ba kane ka projek kan pynlah ïa kane ka Kad ba kan ai jaka hiar ïa ki liengsuiñ kiba heh kum ka A320, da ka jingpynjrong ïa ka runway na ka 1829 meter sha ka 2400 meter.
“Ïa ka runway yn nang pynjrong da 571 meter ban lah ban hiar ki liengsuiñ kiba heh. Ka terminal building ruh yn nang pynheh na ka 5000 sqm sha ka 10,500 sqm,” la ong u Rajan haba bynrap ba ka Sorkar ka la khmih ïa ka kam thied jaka na ka bynta ka projek.
U Ranjan u pyntip ba kane ka projek ka dang don ha ka bynta jong ka jingkhot tender. Ïa kane ka projek la khmih lynti ba kan shimpor kumba 18 bnai hadien ba sdang ban pyntrei ïa ka.
Ki bor pynïaid ka Kad Liengsuiñ ki la kular ba ki trai shnong na ki shnong ba marjan kin long hakhmat eh ha ka lad ïohkam ïohjam.
“Ka jingtrei pynheh yn sa pynïaid shakhmat da ka agency bad ngin pynthikna ba katba lah, ïa ki kam semi-skilled, unskilled yn shim na ki shnong ba marjan katba ïa kiwei, ngin pynthikna ba kan ïaid katkum ka jinglah jong ki, ngin pynthikna ba ki briew kiba dei ki highly skilled bad kiba don ka sap ba la pyntbit kyrpang kin ïoh lang ïa ka lad,” u la ong.
Katkum ka jingong jong u, kumba 70-80 per cent ki briew kiba trei ha kane ka Kad ki dei ki trai shnong.
Haba kylli, u Ranjan u la ong, “Ngin ïa peit lada ka jingwan ki briew ka kot 1.5 million shisnem bad ka kiew sha ka 5-6, kumta la thikna ba kan pynkiew sha ka lai ne saw shah ha ka jingthungkam”.
Shuh-shuh na ka liang jong u Director u la pyntip ruh ba kane ka Kad Liengsuiñ ka don jingthmu ban pyntrei ïa ki CSR project, kynthup ka jingtyrwa ban pynshna ïa ka ïingskul na ka bynta ki khynnah ki bym lah ban ïohi ki khmat.
Ka Kad Liengsuiñ ka dang ïatreilang ruh bad ka tnat Pule Puthi ban pynkynriah noh ïa ka lynti ïaid jong ka nala kaba khang lynti ïa ka um sha ki nongrep kiba don sharum.
