Shillong, Risaw 7:
Da ki hajar ngut ki paidbah na kylleng ka Ri lum Khasi bad Jaintia ha ka 7 tarik Risaw ki la tuid sha ka jingleit ontep don burom ïa u Phadar Hilarius Lamare u Lyngdoh niam ka Balang Katholik Jowai Diocese.
Shwa ban leit sha lum jingtep, la pyndep ïa ka jinglehniam Mass ontep ha phyllaw ka ïingmane St. Theresa Cathedral Parish Jowai.
La ïoh ka jingpule ba nyngkong na u Ma Denis Kurkalang Chairman ka Balang Mihmyntdu, nongpule ba ar na ka Kong Yonilas Lamare kaba dei ka pyrsa jong i Phadar Hilarius Lamare. Ïa ka jingduwai riewngeit la ai da u Ma Anthony Lyngdoh Secretary ka Seng Rangbah Cathedral Parish bad kumjuh ki kyntien sngewlem na u dkhot ka Parish Pastoral Council u Babu Lawrence Bareh.
Ïa ka met jong i phadar la rah ryngkat ka jingrwai, jingduwai bad ka jingïam briew khamtam ki paidbah riew ngeit ka Balang Katholik.
I Phadar Hilarius ila kem pang ha ka 18 tarik u Jylliew 2025 ha ka por 8:50 janmiet, bad la rah sha Woodland Hospital, Sabahmuswang.
Hadien ba ki doktor ki la pynthikna ba ka dei jingpang Stroke la pynkit ïa i sha Nazareth Hospital, Shillong bad la pynthiah ïa i hapoh ICU haduh ka sngi ba ila khlad noh na kane ka sla pyrthei ha ka 5 tarik Risaw ha ka por 7:50 mynstep.
I Phadar Hilarius ila long teng kum u Diocesan Administrator ka Jylla Niam Jowai naduh u snem 2011 haduh u snem 2015. I bat ruh kum u Vicar General jong ka Jowai Diocese naduh u snem 2015 haduh u bnai Nohprah 2020, ha kajuh ka por naduh u snem 2015 haduh ka sngi ba ila khlad, I long kum u Parish Priest ka Cathedral Parish Jowai.
I Phadar Hilarius I dei ruh i President jong ka Jaintia Hills Development Society kaba dei ka social wing jong ka Jowai Diocese naduh u snem 2011 haduh mynta.
Shuwa ba i Phadar Hilarius Lamare in wan sha ka Jowai kum I Diocesan Administrator ka Jowai Diocese, i la trei ruh ha ka Parish Umsohlait Parish Mawkyrwat, Parish Mawkhar, ha St. Paul Seminary Upper Shillong, ha Parish Namdong, ha Cathedral Parish Shillong, bad ila long ruh i Vicar General ka Shillong Arch Diocese naduh u snem 2001 haduh 2011.
