Jowai, Risaw 07
Ïa ka metïap jong uwei u samla uba dang 17 snem rta la lap ha ka step jong ka 7 tarik Risaw na madan jong ka ïing saw kaba saw mala kaba dang don hapdeng ka jingshna, kata hajan ka lynti ban rung sha Jowai Polytechnic, Ladthadlaboh Khliehrymphum.
Ki tyllong khubor ki ïathuh ba une u lanot u dei uba dang pule ha ka klas XI bad uba dei na kawei ka shnong hapoh West Jaiñtia Hills bad uba shongwai marjan kane ka jaka.
La ong ba kane ka ïing ha kaba la lap ïa ka metïap jong u, ka jngai tang kumba 200-250 mitar na ka ïing kaba u shong u sah.
Katkum ki khubor la ïathuh ba une u samla u la mih na la ïing ha ka por kumba 10 baje mynmiet jong ka sngi Nyngkong hynrei um shym la wan phai shuh sha la ïing.
Hadien ka jingpynlong ïa ka jingwad, la lap ïa ka met jong u ha ka step sngi Ba-ar ha ka por kumba 3 baje eiei.
Na ka liang ki pulit ki la lapdien ruh ïa ki katto katne ki tiar ki tar ki jong u kiba kynthup ïa ka pisa bad ka ïitkhmat na ka mala kaba shalor jong katei ka ïing, katba ïa ka mobile phone jong u bad ka jaket la lap na sha trai jong ka ïing.
Na ka liang ki pulit ki dang pynlong ïa ka jingtohkit ban lap ïa ka daw jong ka jingïap.
Na ka liang ka kynhun forensic na Shillong ki la leit jngoh sha katei ka jaka na ka bynta ban lum ïa ki sakhi satar, bad ïa ka metïap bad hadien la pynkit noh shapoh Jowai Civil Hospital, Ialong na ka bynta ban leh ïa ka Post Mortem.
