Shillong, Risaw 07
U Kpa jong i heprit Insaphira Lyngdoh Mawnai, u Bah Gowel Lyngdoh Mawphlang u la ong ba ki dang ap ba ki pulit kin ai jingtip sha ki halor ka jingkwah ka ïing ka sem ban lap biang ïa kiba donkti halor ka jingkhlad i heprit Insaphira.
U la ïathuh ba ki pulit ki la wan shim jingkylli na kiba haïing hadien saw sngi ba la ??p tep ïa i heprit Insaphira hynrei haduh mynta ki pulit kim pat ai jubab.
U la ong, ki bahaïing ki kwah ba ki pulit kin tohkit ban lap ïa kiba donkti hadien ba la phla u khynnah 13 snem uba la ïalam ïa i heprit ha ka step 14 tarik Nailur, 2025 na ïingsah ha Nongrah Nonglum ha ka por 8:00 baje mynstep eiei.
Shuh-shuh u la ïathuh ba haduh mynta ïa katei ka ïing ba lap ïa ka metïap i Insaphira ym pat shah ban trei namar ka dang don ka jingtohkit.
Kum ban shu pynkynmaw, i heprit Insaphira Lyngdoh Mawnai, 4 snem ka rta i la jah na ïingsah ha ka por 8:00 baje mynstep jong ka 14 tarik Nailur hynrei la lap pat ha ka por 8:00 baje mynstep jong ka sngi kaba bud ha ka jaka ba lang ka um kaba rit na jaka ba shna kynroh jong kawei ka ïing kaba dang shna thymmai.
Haba ki pulit ki la rah ban tohkit ïa u khynnah ba dang 13 snem, u la phla ba dei ma uba ïalam bad ïathuh ba ka jingkhlad ine i heprit kadei ba i hap na kynroh jong katei ka ïing.
Na ka liang kiba haïing i Insaphira ki suba jur ba dang don kiba donkti bad utei u khynnah ban pynïap ïa i heprit Insaphira namar ha katei ka jaka ba lap ïa i Insaphira ym shym la ïohi haba ki la leit wad ha ka sngi ba i jah na ïing.
