Shillong, Risaw 07
U Chief Electoral Officer (CEO) ka Jylla, u Dr. B.D.R. Tiwari u la ong ba ka jingdon ki nongthep ‘vote’ ha Meghalaya ka la kiew da palat 9 lak ha kine ki 20 snem ba la dep.
U la pynpaw ïa kane ka jingkiew kaba khraw haba ïanujor ïa ka thup kyrteng ki nongthep ‘vote’ jong u snem 2025 bad ka ‘Intensive Revision’ kaba la dep pynlong ha u snem 2005. Ïa ka thup kyrteng ki nongthep ‘vote’ kaba hashuwa la pynmih ha ka 15 tarik u Ïaïong, 2005.
“Ka jingdon jong baroh ki nongshong shnong kiba la ïoh thep ‘vote’ ha u bnai Nailur, 2025 ka long 23, 06,384 ngut haba ïanujor bad 13,35,816 ha u snem 2005 (kaba pyni ïa ka jingkiew da 9 lak),” ong u Dr. Tiwari ha ka Sngi Ba-ar haba kren sha ki lad pathai khubor halor ka jingpynkhreh ïa ki kam ba hashuwa jong ka Special Intensive Revision (SIR) kaba la pynïaid dang shen ha Bihar, bad ka Election Commission of India (ECI) ka dang don ha ka kam ban pynbna ïa ka SIR ha kylleng ka ri.
U la ong ba ka jingkheiñ na ka bynta u bnai Nailur, 2025 ka pyni ba ki don 11, 37,316 ngut ki shynrang bad 11, 69,062 ngut ki kynthei kiba la ïoh ban ‘vote’. Haba phai pat sha u snem 2005, 6, 64,306 ngut ki dei ki shynrang bad 6, 71,510 ngut ki dei ki kynthei (kiba ïoh ban ‘vote’). Ha kajuh ka por, ki don hynriew ngut ki nongthep ‘vote’ kiba hap hapoh ka thup ‘Third-Gender’ katkum u bnai Nailur, 2025, katba ym shym la don satia ha u snem 2005.
U la ong ruh ba ki don saw tylli ki thup kyrdan ki nongthep ‘vote’ kiba la ithuh katkum ka SIR. Kine ki kynthup ïa ka ‘Category A’ – ki nongthep ‘vote’ kiba la pynrung kyrteng ha ka thup kyrteng ki nongthep ‘vote’ jong u snem 2005 kiba la bthah ban ‘upload’/pynpoi tang ïa ka bynta kaba ïadei na ka ‘Extract’ jong ka thup ki nongthep ‘vote’ jong u snem 2005 ryngkat bad ka ‘Enumeration Form’, ka ‘Category B’ – ki nongthep ‘vote’ ki bym shym la lap kyrteng ha ka thup kyrteng ki nongthep ‘vote’ jong u snem 2005 bad kiba la kha ha India hashuwa ka 1 tarik Naitung, 1987 – ki hap ban ‘upload’/pynpoi tang ïa ka kot ki sla jong ki ryngkat bad ka ‘Enumeration Form’, ka ‘Category C’ – ki nongthep ‘vote’ kiba la kha hapdeng ka 1 tarik u Naitung, 1987 bad ka 2 tarik u Nohprah, 2004 – ha kaba ki kyrteng jong ki kmie ki kpa ym shym la pynrung ha ka thup kyrteng ki nongthep ‘vote’ jong u snem 2005 ki hap ban ‘upload’/pynpoi ar tylli ki kot ki sla – ka kot jong u nongthep ‘vote’ bad ki kot ki sla jong ka kmie ne u kpa bad ka ‘Category D’ – ki nongthep ‘vote’ kiba la kha hadien ka 2 tarik u Nohprah, 2004, ha kaba ki kyrteng jong ki kmie ki kpa jong ki kim shym la rung ha ka thup kyrteng ki nongthep ‘vote’ jong u snem 2005, ki dei ban pynpoi/’upload’ ïa lai tylli ki kot ki sla – ka kot jong lajong, ka kot jong ka kmie bad ka kot jong u kpa.
U Dr. Tiwari u la pyntip ruh ba ka ECI ka la pynbna ba yn pdiang ïa ki ‘Aadhaar Card’ kum ki kot ki sla kiba biang ban pynithuh na ka bynta ka jingpynrung kyrteng ïa ki nongthep ‘vote’, nalor ki 11 tylli ki kot ki sla kiba la don lypa. Kane ka rai ka long hadien ba ka Supreme Court ka la bthah ban kynthup ïa u ‘Aadhaar’ kum ka jingpynshisha ban pynithuh ïalade.
“Ïa ka ‘Aadhaar Card’ yn kheiñ kum ka kot kaba 12 na ka bynta ka jingpynrung kyrteng nongthep ‘vote’,” u la bynrap.
Shuh shuh, u CEO u la pyntip ba ka jingdon jong ki jaka thep ‘vote’ hadien ba la pynbeit ryntih ka long haduh 3615 tylli ryngkat bad ka jingkiew kaba pura kaba long 64 tylli ki jaka thep ‘vote’.
Baroh ki jaka thep ‘vote’ ha kaba ki nongthep ‘vote’ ki don palat ïa ka 1200 ngut ha kawei ka jaka thep ‘vote’, la bthah ban pynbeit ryntih khnang ban pynsuk ïa ka rukom thep ‘vote’ bad ha ka Jylla, ki don 27 tylli kum kine ki jaka thep ‘vote’.
“Nalor ki 27 tylli ki jaka thep ‘vote’, 49 tylli ki jaka thep ‘vote’ thymmai ruh ki dei kiba la mynjur da ka ECI naba katto-katne ki jaka thep ‘vote’ ha kaba ki nongthep ‘vote’ ki la jan kot sha ka 1200 ngut, katto-katne ki bynta namar ka jinglong lum bad ka jinglong ka jaka, ka jingjngai da ka kali bad kiwei-kiwei ki lad jingpynsuk na ka bynta ki nongthep ‘vote’,” u la ong haba bynrap ba 12 tylli ki jaka thep ‘vote’ ki la shah weng noh hadien ba la pynïasoh lang ïa ka jaka thep ‘vote’ ki shynrang bad kynthei sha ka ‘General Polling Station’ hadien ka jingpynbeit ryntih.
