Jerusalem, Risaw:
Katkum ki khubor, la ong ba ka Israel bad ka Hamas, ha ka Sngi Nyngkong ki la sdang ïa ka jingïakren halor ka jingpynkut noh ïa ka thma ha Gaza, hadien ba baroh arliang, ki la ai dak ïa ka jingkyrshan ïa ka jingthmu sangeh thma ba la wanrah bad tyrwa da u President ka United States- u Donald Trump. Ki jingiakren ha Sharm el-Sheikh ha ka Duriaw Basaw jong ka Egypt, ki long kiba la pyniasuk da ka US bad ki thmu ban pynbeit ia ki jingtip ba bniah na ka bynta ka bynta ba nyngkong jong ka plan. Kata ka kynthup ïa ka jingsangeh thma khnang ban ailad ban pyllait ïa baroh ki nongshah rahbor kiba dang sah kiba la bat da ka Hamas kum ka jingsiew kylliang ïa ki spah ngut ki koidi Palestine kiba don ha Israel.
Kane ka jingthmu jong u Trump ka la ïoh ïa ka jingkyrshan kaba khraw na ki ri ka pyrthei bad ka la pynmih ïa ka jingkyrmen ban pynkut noh ïa ka thma ba shyrkhei kaba la pynkylla khongpong ïa ka sain pyrthei ha ka pyrthei, kaba la pynlong ïa ki phew hajar ngut ki nong Palestine ban ïap bad ka Gaza Strip ka la jot rathai. Ka thma, ka la sdang ha ka 7 tarik u Risaw jong u snem 2023, ha kaba ki lehnoh Hamas, ki la leit ban hiar thma ia ka thaiñ Shatei Lam Mihngi jong ka Israel.
