Shillong, Risaw 07
Ki samla kiba la pyndep ban thoh ïa ka exam pulit ha ka 07 Tarik u Risaw 2025, ki la leit tur biang sha ka ophis treikam ka Central Recruitment Board (CRB) kaba don ha Mawlai Mawroh, ban wad jingtip halor ka jing pynslem ban pyllait ïa ka risol thoh exam.
Ïa kane ka exam ki samla ki la pyndep myn ha ka 15 tarik u Jym-mang 2025, bad na ka liang ka Board ka la kular ban pyndep bad pynbna noh ïa ka risol hapoh lai bnai, hynrei haduh mynta Tur biang ki samla thep kam pulit ruh khlem pat pyllait satia.
Kumta na ka liang ki samla ki la leit ban tur ban wad jingtip, ba kaei ka daw ba slem ban pyllait ïa ka risol exam jong ki.
La sakhi ba ha ka jingwan tur ki samla, ki pulit ki la syrtap khraiñ ha surok bad ka jaka rung shapoh katei ka ophis, khnang ba kan nym mih kano-kano ka huri-hura.
Hadien kane, na ka liang u Dalton Marak, IPS, Chairman ka Central Recruitment Board (CRB u la khot ïakren ïa ki samla ban pynshai halor kane.
Haba kren sha ki lad pathai khubor hadien ba la dep ban ïakynduh ïa u Chairman ka CRB, u Dalton Marak, ki samla thep kam pulit ki la pynpaw ïa ka sngewhun halor ka jubab ba ki la ïoh.
Ki la ong ba hadien ka jingïakynduh ïa u Chairman ka CRB, na ka liang kiba ïakhun ïa ka Exam Meghalaya Police Recruitment, ki la sngewhun ïa ka jingïakren bad jingpynshai na ka CRB.
Katkum ka jingïathuh u Dalton Marak, ka jingpynslem ban pynmih ïa kane ka risol kadei namar ka jingslem jong ka kompani kaba shimti ban peit ïa ki ‘marks’ jong ki kyrtong ïakhun ïa kane ka exam, la ong ki samla.
Ki la ïathuh ruh ba na ka liang ka CRB ka la kular ba hapoh u ne u bnai Risaw ne ha u bnai ban wan, yn sa pyllait noh ïa ka risol.
Shuh-shuh ki la kyrmen ba kane ka exam kan long kaba ïaid da ka jingkhuid jingsuba kumba la pynpaw da u Chairman ka CRB bad baroh kiba trei shitom kin ïoh la ka nong.
