Nongstoiñ, Risaw 08
Katba nang ïaid ki sngi katba nang tyllun ki por na u snem sha u snem, ka sor Nongstoiñ kaba dei ka nongbah jong ka West Khasi Hills District, ka la nang kylla sor ha ki bynta baroh bad ka jingnang bun jong ki kali shimet ne ki kali kamai ka la nang kiew bad nang bun kat haduh ba bunsien ka la wanrah ka jingdheng kali bad pynthud ruh ïa ka ïaid ka ïeng jong ki paidbah.
Katkum ka jingïohi bad haba peit ïa kane ka jingjia khah khah jong ka jingdheng kali ha kane ka sor, ka daw bah hi ka long namar ka jingbym don ïa ki jaka pynïeng kali, ym tang katta lah ban ong ba ka dei hi namar ka jingbym ïa burom jong ki para nongñiah kali watla na ka liang ki pulit pynïaid kali ki la pyrshang ban pynïaid beit.
Halor kane ka phang, u Bah Alfred Marthong, President ka Nongstoiñ Region Local Taxi Owner and Driver Association (NRLRODA) haba kren bad u nongthoh khubor u la ong, ka daw jong ka jingdheng kali ka lah ban dei na ka daw jong ka jingbym pat biang ki surok kiba pynïasoh ha ki kyntoit bapher-bapher ha kane ka sor bad lada lah ban pynurlong ban shna ïa ka jingkieng kaba ha ka shnong Tiehsaw kaba marjan bad ka KJP Synod College Nongstoiñ bad kumjuh ïa ka jingkieng kaba marjan bad ka Anderson Higher Secondary School Nongstoiñ khlem pep kan pynkylluid ïa u paidbah.
Shuh-shuh u Bah Alfred u la kyntu ïa ki bor kiba halor ba kin shimkhia ïa kane ka phang lym kumta kan wanrah jingeh kaba kham khraw ïa ka sor Nongstoiñ baroh kawei.
