Ka jingñiah kali thurmur bad pynher sted ka la long kawei na ki daw bah jong ki jingjia aksiden ha ki surok ha India, kaba la shim da ki hajar tylli ki mynsiem briew manla u snem bad kaba ym lah shuh ban ñiew ïa kiba mynsaw. Wat hapdeng ki jingpynsngewthuh paidbah bunsien bad ka jingpynjari ïa ki aiñ pynïaid kali kiba kham pyrkhing, bun ki nongñiah kali ki dang ïai bteng ban nym burom ïa ki kyndon ba kongsan jong ka jingïada ha surok. Ha kane ka kynti, ka sienjam ba dang shen ba la shim da ki Pulit ka Ri Bhoi ban tehlakam ïa ka jingñiah kali thurmur, ñiah kali hapdeng ka jingshoh khawiang bad khlem da pyrkhat, ka dei hok ban ïoh ïa ka jingïaroh. Ka rukom treikam bad shimkhia jong ki, da kaba pyrkhing tyngeh bad ruh ban ai jingpynshai bad pynsngewthuh paidbah, ka long ka nuksa kaba khlaiñ ïa kiwei pat ki district ban bud.
Dang ha kine ki taïew ba la dep, la sakhi ïa ki jingjia aksiden kali kaba shyrkhei ha ki surokbah jong ka thaiñ Ri-Bhoi, ha kaba la duh ruh ïa ki katto katne tylli ki mynsiem briew bad kiwei kiba la mynsaw. La ïohi ba watla na ka liang jong ki Pulit ka Ri Bhoi kiba la ju pynlong barabor ïa ki jingpynsngewthuh paidbah bad jingtalasi hynrei hadien ki jingjia aksiden ba dang shen, la ïohi ba ki la pynjur ïa ki jingtalasi ïa ki kali ban tehlakam ïa ka jingpynher sted ïa ki kali, ka jingdih kyiad haba ñiah kali, bad ka jingshim pass ha ki bynta kiba shyrkhei bad buh jingma, kaba ju lam barabor sha ki jingjia aksiden ha shilynter ka surok Shillong-Guwahati bad kiwei-kiwei ki surokbah jong ka district. Lyngba ka buit treikam kaba la pynbeit bha kaba kynthup ïa ki jaka talasi, ki jingpeit bniah ba kyndit, ka tnat ka la jop ban wanrah ïa ka jingpynbeit kaba kham khraw ha ka leit ka wan ha ka thaiñ. Dei ban ai jingïaroh halor kane ka jingtrei shitom khlem shongthait jong ki pulit na ka bynta ban pynthikna ïa ka jingshngaiñ jong ki nongleit nongwan. Kaba donkam, dei ban leh ruh da kaba tyngeh ïa kiba pynkheiñ aiñ, kata nalor ka jingdaiñ kuna dei ban don ruh da kiwei pat ki lad pynshitom, khnang ba shwa ba kin mih surok kin kynmaw bad pyrkhat bunsien ban ñiah thurmur ne leh stunt ha ki surok.
Ka jingeh ha kaba ïadei bad ka rukom ñiah thurmur kam dei tang ka jingeh jong ka aiñ bad ka shongsuk shongsaiñ; ka dei ruh ka jingsngewkhia jong ka imlang sahlang kaba dawa ïa ka jingïatreilang na baroh ki liang. Tang ki pulit marwei kin nym lah ban pynthikna ïa ka jingshngaiñ ha surok lymda ki nongshong shnong hi ki shim lang ka jingkitkhlieh ha lade. Manla uwei pa uwei u nongñiah kali u dei ban bud ryntih ïa ki kyndon pynïaid kali, kaba dei ruh ka kamram jong ki nongshong shnong, ka jingsdang kaba rit ka lah ban ïada ïa ka jingim briew.
Ka la dei ka por ba ki pulit ha kiwei ruh ki district kin shimkhia lang kumne ban sdang noh ka jingtalasi ïa ki kali khnang ba ka leit ka wan khamtam ha ka por mynmiet kan long kaba shngaiñ. Haba phai ha East Khasi Hills District khamtam lei ha ki bynta jong ka Khyndailad bad Polo, ka kam ka long kaba kyrkieh ba kan don noh ka jingpahara bad talasi ïa ki kali, khamtam lei kito ki kali kiba pynïeng bad shongkai harud surok naba ym tang ba ka buh jingma ïa ka leit ka wan hynrei kam long shngaiñ shuh wat tang ban ïaid ban ïeng da ka kjat. Ka por bad ka juk ka la kylla, wat lada lap ba ki ïeng harud ne pynwit ïa ka leit ka wan, ym long ban ïakren hynrei hap ban sngap bad ïaid ynda la pyllait namar tang kren ne kyrpad ruh ym long shuh, i kumba ka jingkhluit ka kiew wut-wut. Balei haduh katne, shaei shuh ka jingïatip bad burom mar kylliang.
