Shillong, Risaw 08
U Myntri Rangbah ka Sorkar Jylla u la pynbna ba ka Sorkar Jylla ka la rai ban buh ïa ki Detox bad De-addiction Centre ha man la ki District Headquarter bad ban hukum ïa ki pulit ka Jylla ban ïaleh ban pynduh pyndam noh ïa ka jingkhaïi drok, da kaba buh thong ban ai jingsumar ïa ki nongpyndonkam drok hapoh ka Jylla.
ïa kane ka rai la shim ha ka jingïalang ka Drug Reduction, Elimination and Action Mission (DREAM) ba la wan shim bynta da ki heh Sorkar na ki tnad treikam bapher-bapher bad ki nongshong shnong.
Haba kren sha ki nongthoh khubor u Conrad u la ong ba la bthah ïa ka tnad ka koit ka khiah bad Social Walfare ban wad ïa ki jaka ki ba biang, la ka dei ha ki hospital Sorkar ne ha ki jaka ki riew shimet ban buh ïa ki Detox bad De-adiction Centre.
U Conrad u la ong, “Ngi kyrmen ba kine ki centre yn lah ban buh hapoh ki 3-4 bnai ban wan bad ban lah ban pyntreikam ha kylleng ki District ka Jylla.”
U Conrad u la ong, ïa kine ki centre lah ban buh ha ki hospital Sorkar bad ki jaka ki riew shimet lane jong kino-kino ki seng ki ba long la kloi ban ïatreilang bad ka Sorkar kumjuh ruh ha ka jingïalang la ïakren haba ïadei bad ki Standard Operating Procedure (SOP) na ka bynta ban pynïaid ïa kine ki centre bad ka bynta ki shnong ki thaw ha ka imlang ka sahlang.
U la pynthikna ruh ba ka Sorkar kan pyntbit ïa ki briew ba donkam ha kaba ïadei ban pynïaid ïa ki centre, u la pyntip ruh ba la bthah ïa ka tnad pulit ba dei ban pynduh pyndam ïa ki jaka ba pynlong jaka khaïi drok. Kumjuh ruh ba ka tnad pulit kan pynlong ka jingkhynra barabor bad ban buh ïa ki kor CCTV ban peitbniah ïa kum kitei ki jaka.
“Halor kane, la shim ïa ka rai ba ki pulit kin pynlong ïa ka jingpeit bniah kaba man ka por bad kane ka rukom leh kan long kaba pyrkhing bha bad ba kin ym iehnoh shadien ïano-ïano ban pyntikna ba kane ka kam ka la sdang, lehse ngim lah ban leit sha baroh ki jaka tang shisien leit, hynrei ngin sdang na ki jaka ba kongsan ba donkam eh ka jingtreikam ba khlaiñ ki pulit” u la ong.
U Conrad u la ong, ka jingshisha ba ki pulit ki la lah ban kem ïa bun ki nongkhaïi drok, katba na ka jingïadie ïathied khutia kiwei pat ki riew shimet ka la ktah ïa ki ba bun ki samla, ngi la hiar shaduh kita ki bynta bad ngi kwah ban pyntikna ba ki pulit ki treikam bha bad ban buh ïa ki kor CCTV ha kum kine ki jaka bad yn pynbun ïa ka kynhun pahara ki pulit bad kumjuh ruh ka jingïatreilang ki nongshong shnong.
U Conrad u la banjur ba ka Sorkar ka la shimkhia ban ïakhun pyrshah ïa u drok bad ban ïakhun tyngeh pyrshah ïa kito kiba don bynta ha ka jingkhaïi bad pynpoi ïa ki drok.
“Nga kwah ban phah ka khubor sha ki paidbah, ba ka Sorkar ka lah shimkhia halor kane bad phin sa sakhi ïa ka jingïakhun tyngeh ha kine ki sngi ban wan, kumba nga la ong na ka tnad pulit, ka tnad ka koit ka khiah, ka tnad Social Welfare bad na ka imlang sahlang, ngin ïatreilang ban pyntikna ba ngi lah ban pyrkhing bad ruh ban ïakhun pyrshah ïa kane ka jingjyllei u drok hapoh ka Jylla jong ngi,” la ong u Conrad.
Haba kylli shaphang ka jinglong jingman ba mynta jong ki Rehabilitation Centre, u Conrad u la ong ba kiba bun ki District Headquarter ki duna ïa ki jaka bad ki jingdonkam, kaba long ka daw ba ka Sorkar ka la shim ïa ka rai ban buh la kumno-kumno kawei ka Detox bad De-addiction Centre ha kawei pa kawei ka District.
U Conrad u la bynrap da kaba ong ba ka Sorkar kan trei khlem shongthait ban ïakhun pyrshah ïa u drok, tad haduh ba ka Jylla Meghalaya kan lait pura na u drok bad baroh ki nongdih drok kin ïoh ka jingai jingsumar ba kin bha pat.
