Nongpoh, Risaw 08
U Senior Superintendent of Police (SSP) ka Ri Bhoi District, u Vivekanand Singh Rathore ha ka miet jong ka sngi Ba-ar u la hiar hi dalade ryngkat u Additional Superintendent of Police ka Ri Bhoi, u Bah Orville Massar ryngkat bad ka kynhun pulit na thanad Nongpoh ban pynlong ïa ka jingtalasi ïa ki kali kiba pynkheiñ aiñ, kiba kynthup naduh kiba tah ïit ïong, kiba pyndait ïa ki lait kiba thaba (LED), kiba dih buaid, ki trok kiba ïaid na ka liang ka mon, kiba ñiah khlem laisen, ki bym biang ïa ki kot ki sla kali bad kiwei-kiwei de ki jingpynkheiñ aiñ.
Kane ka jingtalasi kaba la pynlong ha kane ka miet ha surobah National Highway 6 hakhmat ka lad ban leit sha ka ophis u Deputy Commissioner ka Ri Bhoi District, ka dei kaba heh tam napdeng ki jingtalasi kali ha Ri Bhoi bad lehse wat ha ka Jylla ruh ha kaba ha kane ka jingkhynra, kaba la pynlong haduh kumba san (5) kynta eiei khlem sangeh, kata naduh ka por 7 baje janmiet tad haduh ka 12 baje shiteng synñia ban khynra naphang ïa kali ba kynthup naduh ki kali Sorkar, ki kali jong ki heh ki hain bad ‘riew paidbah ruh kumjuh, la ïoh ban daiñ kuna haduh T.8 lak.
Kane ka jingbteng bad pynjur jong ki pulit ka Ri Bhoi ban pynlong ïa ka jingtalasi kali, ka dei ym tang ha Nongpoh, hynrei wat ha Umsning, Umroi bad kiwei kiwei de ki jaka, ka dei khamtam hadien jong ki jingjia tyngkhuh kali kiba la shim ïa bun tylli ki mynsiem briew tang ha kine ki khyndiat sngi kiba la dep na ka jingñiah pynher sted bad shoh khawiang jong ki nongñiah.
Ki pulit ka Ri Bhoi kila maham tyngeh ïa ki nongñiah kali ba ki dei ban bud ryntih ïa ki kyndon aiñ haba ñiah kali bad ba kan nym don jingmap satia ïa kito kiba pynkheiñ, naba bunsien tang namar ka jingñiah khlem-akor, ka jingpynher sted bad shoh khawiang u nongñiah, ym tang ba ka buh jingma ïa ki, hynrei ka wanrah ruh ïa ka jingjia ba sngewsih sha kiwei pat ki para nongleit nongwan ha ka surokbah.
