Jowai, Risaw 08
Ka Larnai SC bad Khliehtyrshi SC ki la ïasam mar shi point, katba ka The A Team ka la khur jingjop ha ka 1st Division Football Tournament ba la pynïaid da ka Thadlaskeiñ Sports Association (TSA) ha ka sngi Balang ha Multi Sports Complex Wahïajer.
Ha kane ka jingïalehkai ka Larnai SC bad ka Khliehtyrshi SC ki la kut ha ka jingïakhaid da mar 3-3. Ïa ki kol ka Larnai la thep da u Evershine Nongrum (11 & 17) bad u Enforce Kharsohnoh (32), katba na ka Khliehtyrshi la thep da u Khrawkupar Kharsyntiew (21 & 45) bad u Wanlangki Dkhar (70).
Haba phai sha kawei pat ka jingïakhun, ka The A Team ka la pynliem noh ïa ka Moodymmai SC da 4-0 kol. Ïa kine la thep da u Bornlywell Lamare (13), Supernal Malang (37) bad u Rudolf Lamare (69 & 71).
Ka jingïalehkai ha ka sngi Palei kan long hapdeng ka Jalapang SC pyrshah ïa ka Wahchangiar FC ha ka por 12:30 baje mynsngi, katba ka Evergreen SC ïa ka Nongkhroh Mawsiang ha ka por 2.30 nohphai sngi.
