Shillong, Risaw 08
Ka Committee on Estimates jong ka Ïingdorbar Thawaiñ ka Jylla hapoh ka jingïalam jong u Bah Mayralborn Syiem, MLA bad Chairman, ka la pynlong ïa ka jingïa-lang ban ïakren bad ka Committee on Estimates jong ka Ïingdorbar Thawaiñ ka Rajasthan ha ka Sngi Balang ha Jaipur, kaba long kum shi bynta jong ka ‘Study Tour’.
Ka jingthmu jong ka jingïalang ka long ban ïasam ïa ki jingtip bad ki rukom treikam kiba paka tam kiba ïadei bad ka jingtreikam jong kine ki komiti.
Ki jingïakren ki long halor ka jingpynbeit ryntih ïa ka kam pisa-tyngka, ban pynkhlaiñ ïa ki jingwanrah jingkylla ha ka jingpynïaid kam, bad ban pynbha ïa ki lad ki lynti ban peit bniah ïa ka jingpynlut jong ka Sorkar.
Na ka liang jong baroh ar tylli ki komiti ki la ïasam ruh ïa ki jingshem halor ka bynta jong ki kynhun thaw aiñ ban pyntikna ïa ka jingkitkhlieh bad ka jinglong khuid ha ka synshar-khadar.
Kane ka kynhun na Meghalaya ka kynthup ïa u Bah Mayralborn Syiem (Chairman), ka Miani D. Shira, Remington G. Momin, Bah Damanbait Lamare, bad Bah Gabriel Wahlang.
Ïa ka komiti jong ka Ïingdorbar Thawaiñ ka Rajasthan la mihkhmat da u Arjun Lal Jeengar (Chairman), ha ryngkat ki dkhot – Amit Chauhan, Arjun Lal, Arjun Singh Bamaniya, Gurveer Singh, Chhotu Singh, Jeevaram Choudhary, Pratap Singh Singhvi, Manoj Kumar, Shanti Dhariwal, Samaram, bad Harendra Mirdha.
Kum shi bynta jong kane ka jingleit jngoh, ka komiti jong ka Meghalaya ka la leit ruh ban jngoh ïa u Lamphang ka Ïingdorbar Thawaiñ ka Rajasthan.
Ka jingïakren ka la long kum ka rynsan kaba kongsan ban kyntiew ïa ka jingïatreilang hapdeng ki nongthaw aiñ bad ban pynkhlaiñ ïa ka jingtreikam jong ki komiti ka Ïingdorbar Thawaiñ ha ka ban kyntiew ïa ka jinglong ryntih ha ka liang ka pisa-tyngka bad ka jingsynshar kaba bha.
