Washington, Risaw:
U President ka America, U Donald Trump, u la pynpaw ïa ka jingkyrmen ba ka don ka lad ba shisha ban pynkut noh ïa ka thma ha Gaza, katba ka Israel, ka dang kynmaw burom ïa ki nongshah thombor ha ka 7 tarik u Risaw, ar snem mynshwa, ha ka Sngi Ba-ar.
Ha ka khubor jong u, ha katei ka sngi ba ka Israel ka rakhe kynmaw burom ïa kane ka jingdap snem jong ka thma jongka bad ka Hamas, u Myntri Rangbahduh jong ka Israel, u Benjamin Netanyahu, u la kular ban pynurlong ïa baroh ki thong jong ka thma, kynthup ia ka jingthmu ban pynkhyllem noh syndon ïa ka kynhun lehnoh jong ka Palestine, ka Hamas, kaba la sdang nyngkong da lade ban leit thombor ia ka Israel ha ki 2 snem ba la leit.
“Ngi don ha ki sngi kiba shyrkhei, kiba dap da ka jingsyeir, hynrei ngin dang bteng ban ialeh ban pyn-urlong ïa baroh ki jingthmu jong ka thma: ka jingpynphai biang ïa baroh ki nongshah rahbor, ka jingpynduh noh ïa ka jingsynshar jong ka Hamas bad ba yn pyntikna ruh ba ka Gaza kan ym long shuh ka jingma ïa ka Israel hadien- habud,” ong u Netanyahu haba ai jingkren sha ki nongthoh khubor ha katei ka sngi.
Namar la ong ba kane ka jingiakren ba la shu pynai ktien pateng da kiwei pat ki ri, hapdeng ki nongïakren jong ka Israel bad ka Hamas, ka dang ïaid ha ka nongbah jngohkai pyrthei ba paw nam jong ka Egypt, ka Sharm El-Sheikh, kaba pynshong nongrim halor ka plan ba 20 mat, ba la tyrwa da u Trump, ban pynkut noh ïa ka thma hapdeng ka Israel bad ka Hamas.
“Ka don shisha ka lad ba ngin lah ban leh eiei”, la ong u Trump ha ki nongthoh khubor ha Oval Office bad u la bynrap ruh ba ki nongïakren jong ka US ruh ki don bynta lang ha katei ka jingïakren.
“Nga tharai ba ka don ka lad ba ngi lah ban ioh ia ka jingsuk ha ka thaiñ Mihngi.”
U Trump u la ong ba ka America kan shim ia baroh ki lad- ki lynti ban pyntikna ba baroh arliang ri kin kohnguh ïa kane ka jingïateh kular lada ka Hamas bad ka Israel ki mynjur ïa ka jingsangeh thma.
U nongrahktien ba ha khlieh duh jong ka Hamas, u Khalil al-Hayya, u la ong ba ka kynhun jong u, ka kwah ïa ki jingkular na u President ka US- u Donald Trump, kumjuh ruh na kito ki ri kiba kyrshan ia ka jingsangeh thma.
