Shillong, Risaw 08
Uwei u heprit uba kyrteng u Kyrshanbor Kharmudai uba dang 7 snem ka rta uba na ka shnong Nongrah Lum Myrboh, u la jah na la ïing ha ka janmiet jong ka 8 tarik u Risaw, 2025 ha ka por kumba 4:00 baje eiei.
Haba ïakren bad u Rangbah Shnong jong ka Nongrah, u Bah Denis Lynrah u la ïathuh ba une u heprit u dei u ba dang 7 snem ka rta uba la jah na ka ïing ha ka janmiet jong ka sngi Balang ha ka por kumba 4 baje eiei.
U Bah Denis u la ïathuh ba une u heprit u dang ïalehkai bad ki para khynnah hynrei ha ka por ba ka kmienah jong u, ka la khot bad pyrta ban dih sha, ka la shem ba um don shuh ha ïing.
U la ïathuh ba kam shym don kano-kano ka jingmai ïa utei u heprit hynrei u la jah la ka jah na la ïing ha ka por ba u dang ïalehkai bad ki para khynnah.
U la ïathuh ruh ba une u heprit u dei khunswet u bym don shuh ki kmie ki kpa bad u sah bad ki kmie nah. U don 2 ngut shipara bad une uba jah u dei uba rit.
Halor kane ka jingjah, la ong ba na ka liang jong ki nongshong shnong naduh ki samla ki la ïamih ban leit wad kylleng ki jaka hynrei kim shym la lap satia. La ong ba na ka liang jong ki pulit ruh hadien ba ki la ïoh ka jingpyntip ki la wan poi sha kane ka shnong na ka bynta ban wad lang ïa une u heprit.
