Beijing, Risaw:
Uwei u nongleit jingleit u la ïap katba ym duna ïa ka 200 ngut ki briew ki dang sahkut ha ki lum Tibet jong u lum Everest hadien ba la jia ka eriong kaba la pyniap ïa ki briew ha ka sngi kut taiew, ong ki heh sorkar ka China ha ka Sngi Nyngkong.
Kumba 350 ngut ki briew, kiba la shah kem ha katei ka jingkhynñiuh jumai, ki la lah ban pyllait im haduh mynta, ki la bynrap.
Uwei u nongkiew lum uba la 41 snem ka rta u la khlad noh na ka jingshitom ‘hypothermia’ bad kiwei de ki jait jingshitom, la iathuh ka tnat pathai khubor jong ka sorkar Xinhua da kaba shim ia ka jingiakren bad ki heh sorkar jong ka thaiñ.
La ong ba baroh kitei ki nongleit kiew lum thah kumba 350 ngut eiei, kiba la sahkut noh ha katei ka jaka na ka daw ka jingjur ka jinghap thah ha Dingri County, Xigaze City kaba sha ka phang shatei Lam Mihngi jong ka China, ka Tibet Autonomous Region, ki la poi suk ha kawei ka jaka iakynduh haduh ka miet Sngi U Blei, la iathuh ka tnad treikam.
La ioh ruh ban iakynduh bad kiwei pat ki 200 tam, kiba dang wan shajan ka jaka ba la buh ban ialum lang ha ka ka thaiñ sor Qudeng da ka jingiarap ba la ai da ki bor pyniaid katei ka thaiñ.
Ka jinghap thah kaba jur ka la sdang ban lynshop ia ka thaiñ Dingri baroh kawei ha ka janmiet jong ka Sngi Saitjaiñ, kaba la ktah ïa ki nongleit jingleit ha ki lynti ïaid lum hajan ka shnong Qudeng.
Ki bor pyniaid katei ka county ka la pynlong ïa ki kynhun ba kyrkieh ban pynïasoh ïa ka jingïakren bad ki jingïarap ha ka jaka ba shah ktah.
Baroh ki nongleit jingleit kiba la poi ha Qudeng Town ki la ioh jaka sah kaba biang bad la pynbiang ia ki jingbam bad ki jingpeit bniah ia ki koit ka khiah, la ong ka khubor.
Ki don ha ka jinglong kaba bha, bad don napdeng jong ki kiba la dep sdang ia ka jingleit phai sha la iing, la ong ka khubor.
Katkum ki video bad ki jingïathuh jong ki nongpeitkai ba la buh ha ki social media da ki nongkiew lum kiba la sahkut, u pyrthat bad ka lyer kaba jur ki la lynshop ïa katei ka thaiñ ha ka Sngi U Blei ha ryngkat bad ka jingjur jong ka jinghap thah, ka la tap lut noh ia ki lynti ïaid kjat kiba dei ban poi sha katei ka jaka.
Kawei ka longkmie ha ka nongbah Shenzhen, ba sha ka phang Shathie jong ka China, kaba u tnga jongka, u la leit ban iaid kjat ha ki lum jong ka Tibet, ha kaba ka iathuh ba ka la ioh ia ka phone na u, uba la phah ia ka ban pan jingïarap na ki bor pyniaid ban leit ban iarap ia u, hadien ba ka kynhun jong u ka la sahkut ha ka jinghap thah lane ka jinghap ïor kaba jur ha Oga Campsite ha ka them Karma.
Kawei pat ka kynthei, ka bym kwah ban pynpaw kyrteng, ka la phone mardor ia ki pulit jong ka thaiñ, kiba la iathuh ia ka, ba ki don ki nongleit jingleit, kiba la dep ban iakynduh ia ki bad ba ki dang phah ia ki kynhun pynlait im.
Hynrei la ong ba ka long kaba donbok ba katei ka kynhun, ka don 16 ngut ki briew nongiarap, kiba kynthup ia 3 ngut ki nongpyniaid bad 3 ngut ki nongiarap ban rah bad kit ia ki tiar- ki tar kiba lah ban kit ia ki jingkit kiba khia kumba 20 kg bad ki nongprad lynti ban pynkhuid ia ka lynti ïaid ba kin lah ban poi sha ka jaka ba ki thmu.
