Shillong, Risaw 08
Ka OM Roy Memorial Higher Secondary School na Mawlai Kynton Massar ka la long ka lahduh ha ka 10th Inter School Knockout Tournament 2025, hadien ba ka la lah ban pynliem noh ïa ka Mawlai Presbyterian HSS na Ïewrynghep haduh 7-0 kol ha ka jingïakhun final kaba la long ha ka sngi Ba-ar ha Madan Heh Mini Stadium, Mawlai Phudmuri.
Ha kane ka jingïakhun final ba la pynïaid da ka Federation of Khasi Jaiñtia and Garo People (FKJGP), Mawlai Circle, ka OM Roy ka la thep 5 kol ha ka kylla step bad 2 kol ha ka kylla miet. U Jonathan Kharbani u la khur ïa ka hat-trick bad u la ïohpdiang ïa ka khusnam Top Scorer hadien ba u la thep baroh 10 kol ha kane ka lympung.
Katba u Damebandon Mawkhroh, ka Sacred Heart Boys HSS, Mawlai u la ïohpdiang ïa ka khusnam Promising Player, ka nam Best Goalkeeper ka la leit sha u Lumlangki Shangpliang na ka OM Roy Memorial, ka nam Best Player sha u Eveneser Sun na ka OM Roy bad ïa ka khusnam Best Dicipline Team la ïoh khur da ka Bethesda School, kaba na Mawïong.
Ha kane ka lympung la wan shim bynta da 14 tylli ki skul bad la sdang naduh 19 tarik u Nailur.
Haba ai jingkren kum u kongsan u Bah Dundee C. Khongsit, President ka FKJGP Sengkmie u la pyrto ïa ki nonghikai kiba ïai trei shitom ban hikai ïa ki khynnah, la ka dei ha ki jingpule ne ha ka kam ïalehkai. “Ka jaitbynriew kaba pynlut por ïa ki khynnah samla ka dei ka jaitbynriew kaba don ïa ka lawei bad kaba don ïa ka jingkyrmen.”
Katba na ka liang u Bah Eldie N. Lyngdoh, General Secretary kum symbud kongsan u la ïaroh ïa ka FKJGP Mawlai Circle kaba la pynlong ïa kane ka lympung ïalehkai haduh 10 sien lynter. U la ong ba kam dei kaba suk, bad u ngeit ba ki la ïaid lyngba bun ki mawjynthud bad jingeh.
Ha kane ka sngi la ïa don lang u Bah Khrawkupar Nongsiej, President FKJGP Mawlai, Bah Varzelinno Lyngdoh, Secretary, ki dkhot ka FKJGP, ka KSU Mawlai Circle, ki nonghikai ki khynnah skul bad kiwei-kiwei.
Hashuwa ban ïakhun ïa ka final ka la don ka jingïalehkai paralok, ha kaba ka FKJGP North Khasi Hills ka la jop da 5-2 kol pyrshah ïa ka FKJGP Mawlai.
