Jowai, Risaw 08
Ka Lumphyrnai Sohphoh ka la rah ïa ka nam lahduh ha ka lympung ïalehkai Super Division-Kesilroy Pala Memorial Trophy ba la pynïaid da ka Thadlaskeiñ Sports Associa -tion (TSA), hadien ba ka la lah ban pynliem noh ïa ka Mukhla Raij lyngba ka tie-breaker da 4-3 kol ha ka sngi Ba-ar ha Multi Sports Complex Stadium, Wahïajer.
Ha kane ka jingïalehkai ka la long kaba itynnad bad kaba ïabiang bor bha ha kaba kim shym la lah ban pynkhih jar ha ka kylla step. Dei ha ka kylla miet ba ki la ïoh ban thep mar 1-1 kol. Ka Mukhla Raij ka la thep kol nyngkong lyngba u Welcome Sari ha ka minit kaba 50, hynrei hadien shiphew minit u Pynbiang Mynsong u la pynphai kylla na ka bynta ban pynlong ïa ka Lumphyrnai Sohphoh ban ïakhaid mar shi kol.
Hadien ba kine ki kynhun kim shym la lah shuh ban thep kol haduh kaba kut ka jingïalehkai, na ka liang ki bor pynïaid ki la rai ban pynïakhun ïa ka ‘extra time’ kaba mar 7 minit shiliang, pynban kine ki kynhun kim shym la lah ban pynurlong bad dei lyngba ka tie-breaker ba ka Lumphyrnai Sohphoh ka la lah ban pynurlong ïa ka jingjop.
Ïa kane ka lympung ïalehkai la wan ban pynhap pyrda da u Symbud Myntri Rangbah ka Jylla u Bah Sniawbhalang Dhar ha ka jingdonlang u Myntri ka tnat ïalehkai u Bah Wailadmiki Shylla, u MDC JHADC Bah Reformingson Lamare, u District Sports Officer (DSO) ka West Jaiñtia Hills District Bah Khroobok Passah, u President ka Meghalaya Football Association (MFA) Bah Hamletson Dohling nalor kiwei pat.
Haba ai jingkren ha katei ka sngi, u Bah Sniawbhalang Dhar ula ïaroh ïa ki nongkitkam ka Thadlaskeiñ Sports Association kiba la pynkhie im biang ïa ka TSA hadien ba ka la duh la dam noh da ki phew snem.
U la pynbna ruh ba ha kine ki 4-5 bnai yn sdang noh ka jingtei pynïeng ïa ki Floodlights hapoh ka Multi-Sport Complex Stadium, Wahïajer bad ka lympung ïalehkai Super Division ka ban wan yn pynlong noh ha ka por janmiet.
Nalor ka khusnam sha ka lahduh bad kaba wan ba ar, la sam ruh ïa ki khusnam Top Scorer sha u Sumar Suting na ka Lumphyrnai Sohphoh, Best Goalkeeper ka leit sha u Banshan Mukhim na ka Mukhla Raij, bad Best Player la ïoh da u Pynbiang Mynsong na Lumphyrnai Sohphoh.
Ïa ki khusnam la sam da u Bah Wailadmiki Shylla, ha ka jingïadonlang ruh u President TSA Bah Kmenlang Shylla, u Vice President TSA Bah Eberist Pariat nalor ki dkhot nongkitkam ka MFA bad TSA.
Ka lahduh jong kane ka lympung kan ïoh ka lad ban mihkhmat sha ka Meghalaya State League ka ban sa long ha une u snem.
