Shillong, Risaw 08
Ka Hynñiewtrep Youth Council (HYC) Seng-kmie kan dang bteng ban khynra ïa kiba die drok nangne shakhmat hadien ba ka dang sangeh shipor.
Haba ïakren bad u Bah Roykupar Synrem, President ka HYC Sengkmie u la ïathuh ba ha ka jingkhynra jong ka seng ha kine ki snem, la lap ba ka jaka ba jur bha ka jaka ïadie ïathied kaba nyngkong ka dei ha Lumsurvey namar ha kane ka jaka ki wan na kylleng ki briew kiba sah ha Shillong.
U la ïathuh ba ki jaka ba jur bha ki don ha Jhalupara bad Madanrting katba kiba ngop ban dih ïa une u drok dei ki samla Khasi.
U la ïathuh ba naduh ba khynra ka seng ka la duna ban die drok ha jaka paidbah.
“Naduh ba ngi la ïoh ban bat ïa kiba dih, ngi la pyrshang ban pynsngewthuh ban kylla kaba mut hynrei haduh mynta kaei kaba ka Sorkar Jylla ka leh lyngba ka Dream Mission kam pat urlong namar ki duna palat ki jaka sumar ïa ki briew kiba la ngop ha u drok,” u la ong.
U la pyntip ba kito kiba wan na ki longïing kiba duk ki shem shitom ban shah sumar namar ka jingrem eh ka bai sumar kaba poi haduh 10 hajar haduh 15 hajar tyngka shibnai ha kito ki jaka sumar kiba dei jong ki riew shimet.
Kumta u la ong ba lada ka Sorkar ka pynbun ki jaka sumar kan ïarap ïa ki longïing kiba duk ba kin shah sumar ban pynkylla bamut ïa ki.
