Shillong, Risaw 08
Ka Voice of the People Party (VPP) kaba bat ïa u lakam ban synshar ha Khasi Hills Autonomous District Council (KHADC), kala phah da ka notice sha kito ba trei ïa ki kam khaïi pateng, da ka hukum ba ki dei ban siew noh ïa ka khajna Professional Tax.
Ha kane ka hukum, wat ki dukan sha, dukan ja, ki dukan die marbam, dukan die mar barit baria, die kwai dong, kim shym la lait bad ruh la leh khlem da pynïapher shuh la phi dei ki Khasi ne ki bar Jylla.
Kane kan dei ka sien ba nyngkong ba ka KHADC kan hukum siew khajna Professional Tax ïa ki dukan ki paid Khasi ha man ki jaka bad ki shnong ki thaw.
Ki Executive Committee jong ki snem ba la leit, ki lum ïa ka khajna Professional Tax na ki briew ba trei ïa ki kam khaïi kynthup ki contractor, ki supplier bad kiwei-kiwei hynrei ym ïa ki nongshong dukan sha, ja, die kwai dong, dukan die marbam.
Katkum ki notice ba la phah da u Superintendent (Professional Tax) ka KHADC, sha ki dukan sha, dukan marbam ha Mawlai Mawiong, la ong ba haba pyntreikam ïa ka notification ka Sorkar No ERTS (T) 106/79/408 ba 1 tarik Naitung, 1996, bad katkum ka kyndon 3 jong ka Meghalaya Profession, Trades, Calling and Employment taxation act, la bthah ba kino-kino ki briew kiba trei kam khaïi pateng kin hap siew ïa ka khajna manla u snem.
Ka ong ruh ba katkum ka kyndon 7 jong kane ka aiñ, la bthah ïa ki nongshong dukan ba kin ai jingtip ïa ka jingïoh kamai ha ka shisnem lyngba ka form ha ryngkat ki kot ki sla ban pynsakhi.
Katkum kane ka notice, u Superintendent u la bthah ïa ki dukan ba ïoh pdiang ïa ka notice ba kin ai noh ïa ki jingtip halor ka jingïoh kamai jong ki ba shisnem sha ka ophis jong u, hapoh ka 15 sngi lym kumta ka ophis kan leh eiei pyrshah ïa ki bym bud ryntih katkum ki kyndon jong ka aiñ.
