Mairang, Risaw 08
Kum shi bynta ban rakhe ïa ka jingdap kaba 500 snem jong ka Hima Nongkhlaw, ka Kynshi Pyllun Sports Association ha ka sngi Ba-ar ka la pynlong ïa ka Inter Zone Knockout Football Tournament 2025 ha madan Umsoit Kynshi, Eastern West Khasi Hills District.
Ha katei ka sngi plie ïa kane ka lympung, ka Tengri SCC ka la khur ïa ka jingjop hadien ba ka la lah ban pynliem ïa ka Kynshi Mawria SC da 3-0 kol.
Ha kane ka sngi la ïadonlang u MDC ka Mawthadraishan u Bah Powell Sohkhlet uba dei ruh ha ka juh ka por u President ka synjuk ha ryngkat kiwei ki dkhot bad ki samla kiba la wan ban ïashim bynta.
Haba ai jingkren ha katei ka sngi, u Bah Powell ula ong ba ka jingpynlong ïa kane ka lympung ka long ban ailad ïa ki khun samla ha ka jingïalehkai kynjatbol bad lyngba kane ka lympung ka long ruh ban kynmaw ba ki dei ki khun ki hajar ka hima Nongkhlaw kaba la paw bad pynmih ïa ki khlawait ka ri bad ka jaidbynriew.
Ula ong ruh ba kane ka lympung ka pynïatylli bad namar kane ka donkam ïa ka jingïatylli ban ïaleh pyrshah ïa ki jingsniew khamtam ïa u drok bad kiwei ki jingsniew.
