Shillong, Risaw 08
U MLA ka Mawlai Constituency u Bah Brightstarwell Marbaniang u la kyntu na ka Sorkar Jylla ba kan pynurlong ïa ki phra tylli ki mat jingdawa, kynthup ïa ka jingdonkam ban maramot pynbha ïa ki jaka ïalehkai naduh ki madan ïalehkai, ki indoor stadium lem bad ka jingai jingïarap na ka bynta ki klob bapher-bapher kiba don ha Mawlai.
Utei u nongmihkhmat u la leit ban aiti da ka dorkhas hakhmat u Myntri ba thymmai ka tnat ïalehkai ka Sorkar Jylla u Bah Wailadmiki Shylla ha ka sngi Balang hapoh ka kamra treikam jong u.
Kat kum katei ka dorkhas, utei u nongmihkhmat u la pynpaw ba ka Mawlai ka don hapdeng ka jingeh halor ka jingduna ïa ki madan ïalehkai kiba biang na ka bynta ki nongïalehkai ban kilan met. La ong ba bun na ki samla kynthup ïa ki klob ïalehkai ki ïaleh katba lah ban ïoh ïa ki jaka ïalehkai kiba biang. Watla ki don katto katne tylli ki madan ha ki jaka bapher-bapher jong ka Mawlai kum ha Mawïong Rim, Mawïong Umjapung, Umthlong, Nongkwar, Mawroh, Mawkynroh, Umshing, Mawtawar, Umsaw, Nongkohlew, Mawsiatkhnam bad Umrynjah, hynrei kine ki madan baroh ki donkam ban maramot pynbha kum ka jingsiang ïa ka madan phlang kaba biang, ki nala pyntuid um bad ki jingker baroh sawdong.
La ong ba ki don khyndiat ki jaka ïalehkai indoor stadium (community hall) ha Mawlai. Hynrei bun ki don kiba la sdang ban jot rathai kaba pynlong ban ym shngaiñ bad ban ïalehkai. Ka community-cum-indoor stadium kaba don ha Mawïong Umjapung bad ha Nongpdeng ki la donkam ban maramot kyrkieh khnang ban lah ban pyndonkam biang ïa ki.
U Bah Bright u la pynpaw ïa ka jingdonkam ban tei ïa ka jaka ïalehkai (indoor) kaba heh khnang ba kan long ka jingïarap ban pynlong ïa ki jingïalehkai bapher bapher kum ka Badminton, Table Tennis, Volleyball, Basketball bad kiwei kiwei ryngkat bad ki jingpynbiang ïa ki jaka shong na ka bynta ki nongpeitkai, ki kamra khreh bad ki jingdonkam ba kyrpang. Ka jingbymdon ïa kum kine ki jaka ïalehkai (indoor) ka la long ka jingkhanglad ban kyntiew ïa ki sap ïalehkai jong ki khynnah kiba don ka jingangnud ban nangkiew shaphrang.
U la ong ba donkam ban thaw ïa ka madan ïalehkai phutbol kaba heh (standard size) bad ki jingdonkam kum ki flood light, ki jaka shong jong ki nongpeitkai bad ban pynbiang ïa ka athletic track lem bad ki tiar ïalehkai na ka bynta ban kyntiew ïa ki jingïalehkai bapher-bapher.
Shuh-shuh utei u MLA u la pynpaw ba bun ki klob ïalehkai ha Mawlai ki ïakynduh jingeh ha ka liang ka jinglut jingsep bad ka long kaba eh ïa ki ba kin pynbha ïa ki jaka ïalehkai ne ban pynbiang ïa ki tiar ïalehkai na ka bynta ki nongïalehkai jong ki. Te kumta ka jingai jingïarap pisa man ka por ka long kaba kongsan bha na ka bynta kine ki klob ban bteng ïa ka jingtreikam jong ki bad ban kyrshan ha ka ban sei ïa ki nongïalehkai kiba don sap.
Utei u MLA ka VPP u la ong ba ka jingthung ïa ki coach ba pura ha ki jingïalehkai bapher bapher kum ka phutbol, basketball bad athletics ka long kaba donkam. Ka jingpynlong ïa ki prokram kilanmet na ka bynta ki khynnah kiba don ïa ki sap ba kyrpang man la u snem ka long kaba donkam na ka bynta ban kyntiew ïa ki nongïalehkai kiba don sap na Mawlai bad ki thaiñ ba marjan.
U Bah Bright u la pynpaw ruh ka jingdonkam ban mang pisa bad ban pynbiang jaka ban kyntiew ïa ki jingïalehkai tynrai bad ban pynneh pynsah ha ka pateng ka ban wan. U la ong ruh halor ka jingsam ïa ki tiar ïalehkai na ka bynta ki khynnah ïalehkai bad ka jingsumar man ka por ïa ki tiar kiba la don lypa ha ki skul, ki shnong bad ki klob.
