Tura, Risaw 08
Arngut ki ophisar na ka tnad Forest jong ka GHADC ki la shah ujor ejahar hadien ba kawei ka ‘Pick-up’ kit dieng kaba la ïoh jingbit ban kit, ha ka jingsiew kylliang na ka bynta ka pisa, ka la shah bat noh ha uwei pat u ophisar uba na kane kajuh hi ka tnad treikam.
Ïa kane ka ejahar la ujor ha u Ophisar ba dei peit jong ka Selsella Police Outpost da uwei u briew uba kyrteng u Jamirul Islam na ka shnong Silkata kaba hap hapoh Rajabala.
Katkum ka ejahar, la shah ïa u Islam ban kit dieng ha ka ‘Pick-up’ kiba la thmu ban shna ïa ka ïing jong u ha ka 25 tarik Nailur hadien ba u la siew T.4,000/- sha uwei u ‘Forester’ uba dei jong ka GHADC Selsella Forest Office.
Hynrei sa uwei pat u ‘Forester’ uba dei na katei kajuh hi ka ophis u la wan sha katei ka jaka ha ka 26 tarik u Nailur bad la ïathuh ba u la dawa T.85,000/- ban shah ha ka ban kit ïa ki dieng kiba dang sah.
Hadien ba la kyntait, ïa ki dieng, ryngkat bad ka trok ‘Pick-up’ la kurup noh bad la rah sha Selsella Forest Office da utei u ‘Forester’ uba ar, ha kaba ïa ka kali la pyllait noh tang hadien ba la siew T.35,000/-, kaba la kynnoh ba kam shym la don kano-kano ka phom jong ka ‘receipt’ ophis.
Da kaba kynnoh ba kitei ki arngut ki ophisar ka GHADC ki don ïa ka bor ha ka kyrdan jong ka kam (jong ki) da kaba dawa pisa, u Islam u la dawa ban pynngat mukotduma katkum ka ejahar jong u pyrshah ïa kitei ki arngut ki ophisar.
