Nongpoh, Risaw 08
Katba ki pulit jong ka Ri Bhoi District hapoh ka jingïalam jong u Senior Superintendent of Police, u Vivekanand Singh Rathore ki dang pynlong ïa ka jingtalasi ïa ki kali kiba pynkheiñ aiñ ha ka surokbah ha Nongpoh ha ka por shiteng synñia, la ïohi ba wat u Dr Mukul Sangma, Nongïalam ka Liang Pyrshah ha ïingdorbar thawaiñ ka Jylla, katba u dang thmu ban kiew sha nongbah Shillong, u la sangeh ban pynpaw ïa ka jingsngew kmen bad ai jingïaroh halor kane ka sienjam kaba la shim bad ïalam da u SSP ka Ri Bhoi.
Haba kren sha u SSP ka Ri Bhoi, u Dr Mukul u la ong ba shen un pynbeit ban pynlong da ka jingïalang ban khmih bniah halor ka jingshngaiñ jong ki paidbah nongleit nongwan bad wad jingtip ruh halor ka jingjia jong ka jingkhlad jong ki saw ngut ki heprit kynthei na ka shnong Thadrang Madan bad ruh ar ngut ki nongñiah kali Sorkar na North Garo Hills ha ka surokbah National Highway 6 ha Umsawnongkharai ha kine ki khyndiat sngi ba la dep.
Shuh shuh u la pynpaw ruh ban ai ïa ka jingïatreilang bad ki bor pulit ka Ri Bhoi na ka bynta ban wanrah ïa ka bha ka miat bad ka jingshngaiñ jong ki paidbah nongleit nongwan ha ka surokbah bad kyntu ruh ïa ki bor pulit ba lada lap ïa kiba mynsaw ha surok, ba kin rah mar sha ka Trauma Centre jong ka Nongpoh Civil Hospital khnang ba kin ïoh ïa ka jingsumar kaba kloi bad lait na ki jingjia ba sngewsih.
