Shillong, Risaw 08
U Alem Khongwir u la thep ar kol na ka bynta ban pynlong ïa ka Mylliem SC ban pynliem noh ïa ka Nongrim Hills SC da 4-1 kol ha ka Shillong Premier League 2025 kaba la long ha ka sngi Balang ha SSA Stadium kaba ha First Ground, Polo.
Ïa kine ki ar kol u Alem u la ïoh ba un thep ha ka minit kaba 36 bad 50, ïa kaba la bynrap lang da u Remark Kharmalki (65) bad Kevin Kurkalang (83), katba ïa ka shi kol ban lait brut ka Nongrim Hills la ïoh ban thep da u Bansynshar Kharshong (41).
Da kane ka jingjop, ka Mylliem ka la jam sha ka kyrdan kaba phra hadien ba ka la ïoh ban khur 8 point bad ka la lait na u line saw (relegation zone), mar ïa ryngkat bad ka Laitkor. Ka nam rem jong ka Nongrim Hills ka la pynlong ïa ka ba kan khreh hiar noh na kane ka lympung hadien ba ka la wan ha ka kyrdan ba shatrai bad 1 point.
Haba phai sha ka jingïakhun, ka la buh jingeh bha ïa ki rangïalehkai kiba ïalehkai ha madan, namar u slap uba la wan ban sdang ther naduh ka por mynsngi, ka la pynthut bha ïa ka madan ïalehkai kaba bunsien ka lam btuid bad lang um bha ki bynta jong ka.
Ha ka jingïakhun kaba la long ha ka sngi Ba-ar, ka Langsning FC ka la pynshaïong ïa ka Nangkiew Irat SC da kaba ka la pynliem haduh 5-0 kol. U Wanshwadame Diengdoh (40 & 52) bad u Donlad Diengdoh (90 & 90+1) ki la thep mar ar kol, katba ïa kawei pat la pynbud da u Manbhalang Nongmin (84).
Da kane ka jingjop, ka Langsning ka la khur 14 point bad ka la don ha ka kyrdan balai, katba ka Nangkiew Irat ka la hiar sha ka kyrdan ba saw bad 13 point.
Ka wat jingïakhun jong ka SPL kan jam sha ka kylla kaba phra ha kaba kan sdang naduh ka sngi Palei hapdeng ka Mawlai SC pyrshah ïa ka Rangdajied United FC ha ka por 4:30 janmiet.
