Nongpoh, Risaw 08
U Senior Superintendent of Police (SSP) ka Ri Bhoi District, u Vivekanand Singh Rathore haba kren sha ki lad pathai khubor hapdeng ka jingtalasi kali kaba la pynlong ha Nongpoh, u la ïathuh ba katkum ki jingkheiñ ba la ïoh, wat lada ym pat pynthikna, tang na ki daw jong ki jingjia tyngkhuh kali, la jan sanphew (50) ki briew kila duh noh ïa la ka jingim tang ha ka shi snem.
U la ong ruh ba wat lada kane ka jingtalasi kali ka dei kaba la pynlong manla ka por, ka jinghiar madan ka jong u dalade lem bad kiwei de ki heh pulit, ka dei ban ai mynsiem ïa ki pulit kiba ju pynlong ïa ki jingtalasi kali kiba na ka por sha ka por bad ruh khamtam ban ai ka khubor kaba shai sha baroh kiba ju pynkheiñ aiñ.
Utei u heh pulit u la ïathuh ba katkum ki jinglap ha kine ki khyndiat taïew kiba la dep, ka daw jong ka jingjia tyngkhuh kali hi, bunsien ka dei na u nongñiah uba la buaid ne shoh samthiah bad kham ñiar ki jingjia kiba dei na kiwei pat ki daw. U la ïathuh ba katkum ba la pynbna paidbah, ki kali ki lah ban ñiah sted tang haduh 80 kilometer shi kynta ha ka surokbah ha Ri Bhoi, hynrei bunsien ki don kiba pynkheiñ aiñ bad ñiah sted palat ïa kaei kaba buh.
U SSP u la ong ruh ba wat lada na ka liang ki bor pulit kim lah ban pahara baroh 24 kynta ha shilynter jong ka surok, hynrei kin ïaleh katba lah ban wanrah jingshngaiñ ïa ka leit ka wan jong ki paidbah bad um kwah ban don jingjia ba sngewsih tang namar ka jingñiah khlem-akor jong ki katto katne bad dei halor kata ka nongrim ba la pynlong ïa ki jingtalasi kali na ka por sha ka por.
Ha kaba ïadei pat bad ka jingsangeh khlem-akor jong ki nongñiah trok hapdeng ka surokbah, lane hapoh jong u lain uba lieh, u Rathore u la ong ba kane ka dei kaba beaiñ bad ba ki kyndon jong ka National Highway Authority of India (NHAI) ruh kam shah satia ban pynsangeh kali hapoh u lain lieh. Utei u heh pulit u la kyntu ruh ïa ki paidbah lada lap ïa kino-kino kiba pynkheiñ aiñ ban pyntip sha ki pulit ha u number 112 lane ba kin shon bad ring da ki dur khih bad phah sha u WhatsApp number 6909300160 khnang ba kin ïoh ban leh ïa kaba donkam katkum ki kyndon aiñ.
Ha kaba ïadei pat bad ka jingong ba ka surokbah kam long shuh kaba shngaiñ na ka bynta ki paidbah nongleit nongwan, u Rathore u la pynpaw ba ka surokbah hi ka long kaba shngaiñ, hynrei ki dei ki nongñiah kali kiba pynlong ïa kane ka surokbah ka bym shngaiñ bad bynrap ba dang donkam ban leh shuh-shuh halor kane ka bynta kum ban pyndait ïa ki kor ring dur (CCTV), ki rumble strips bad kiwei-kiwei de khamtam ha ki jaka ba ju khongwaiñ bad shait mih ki jingjia tyngkhuh kali.
U la ïathuh ruh wat lada na ka liang jong ki bor pulit ki ju pynlong ïa ki jingïalang pynshai paidbah halor ka rukom ñiah kali bad bun na ki nongñiah kali na ka Jylla kila sdang ban sngewthuh, hynrei ka jingeh ka long ba ki nongñiah kali na shabar ka Jylla kim tip ïa kine ki aiñ da kaba kdew ïa ki trok kiba ïaid ha ka liang ka mon jong ka surok bad kaba long bakla.
Na ka liang u Rathore u la pyntip ruh ba na ka liang ki bor pulit ha ryngkat bad u Deputy Commissioner ka Ri Bhoi kila shimkhia halor kane ka bynta, ka dei pat ka kamram jong ka NHAI ban leh ïa ka bynta ka jong ka, naba ka surokbah ka dei kaba la khmih da maka bad kyrmen skhem ba lyngba ka jingshimkhia lang jong baroh, ka surok kan long shuh-shuh kaba kham shngaiñ ïa ki paidbah nongleit nongwan, na kaei kaba ka long mynta.
