Shillong, Risaw 08
Watla hadien ba la ïoh pdiang ïa ka kaiphod na ka komiti wad bniah ne ka ‘Fact-finding Com-mittee’ halor ka jingkynnoh ba ka don ka jingtih dewïong be-aiñ ha ka Jylla, hynrei haduh mynta ka BJP kam pat lah ban pynpaw paidbah ïa kane.
U State-President ka BJP, u Rikman G. Momin u la pynbna ha ka 22 tarik Jymmang ba ïa ka kaiphod la ïoh pdiang bad kular ruh ba yn sa pynbna ïa ka ha ka por kaba biang.
Ïa kane ka komiti kaba la thaw ha ka 11 tarik u Rymphang, la bynshet ban tohkit halor kane ka kam.
Hapoh ka jingïalam u Convener, u Bernard R. Marak bad Secretary, Bah Mariahom Khar-krang, kane ka komiti ka kynthup ïa 8 ngut ki dkhot.
Hynrei haba la kylli halor ka jinglong-jingman jong katei ka kaiphod ha ka jingïakynduh bad ki nongthoh khubor ha ka Sngi Balang, u Bah Kharkrang uba dei ruh u nongaiktien ba rangbah ka BJP, u la kdew sha u Chairman ka komiti, u Bernard N. Marak, da kaba ong, “Phi hap ban kylli na u Chairman… un sa lah ban batai.”
U Bah Kharkrang u la bynrap ba kum u dkhot um don ha ka kyrdan ban ong eiei shuh nalor kane.
