Shillong, Risaw 09
Ka Sorkar Meghalaya bad Assam, kila pynjari da ka korphiw miet ha khappud ka thaiñ Lapangap hadien ba mih ka jingïakynad kaba jur hapdeng ki paid Karbi bad ki Pnar, kaba lam sha ka jingïap jong uwei u Karbi.
Une u Karbi uba ïap u kyrteng u Orivel Timung, 45 snem bad ïa ka met jong u, la pynkit noh sha Hamren ban leh ïa ka post mortem.
Haba pynbna ïa kane, u Symbud Myntri Rangbah ba khmih ïa ka tnat Kam Pohiing (Police), Bah Prestone Tynsong, ula pyntip baki Sorkar na ki ar Jylla kila pynbna ban pynjari da ka korphiw miet haka thaiñ Lapangap, kaba la sdang treikam mynta ka miet.
“Ka Sorkar Assam kala dep pynjari ïa ka korphiw miet ha ki thaiñ khappud ka Assam bad ka Meghalaya ruh kan pynjari lang noh ïa ka korphiw miet ha Lapangap khnang ban lah tehlakam ïa ka jingïakynad,” ula ong haba pynpaw ïa ka jingsngewsih halor ka jingïap u briew na ka liang ka Assam.
Haba kylli, u Bah Prestone ula ong, “Nga la ïakren bad u Superintendent of Police ka West Jaiñtia Hills, uba la pyntip ba ka jingdon ki pulit ka la bun ha ka thaiñ hynrei ula pynkhreh lypa pat ïa ka kynhun lada donkam ban phah ha kano-kano ka por.
U Bah Prestone ula pyntip ba ka Sorkar ka la shimkhia halor kane ka jingjia bad ka la don ka jingïakren hapdeng ki arngut ki Myntri Rangbah ki ar Jylla bad kumjuh ruh ki Chief Secretary, ban lah ban wanrah pat ïa ka shongsuk shongsaiñ.
Haba batai shaphang ka jingmih kane ka jingïakynad, ula ïathuh ba ki pulit ka Meghalaya ki la leit synran ïa ki nongrep na Lapangap ban leit lum leit lang ïa ki mar-rep ha ka jingïadonlang ruh ki pulit ka Assam. Hynrei kynsan-kynsan ki Karbi ki la wan ban pynthut bad ka la mih ka jingïakynad kaba jur.
U Bah Prestone ula ïathuh ba ka Sorkar ka la bthah ïa u SP ba un peitngor ïa kaei kaba jia ha ka thaiñ bad ban pynjur ïa ki bor pahara khnang ba kin nym mih kino-kino ki jingjia ba sngewsih.
