Imphal, Risaw:
Ka seng Congress ka la kynnoh ïa ki jingleh bym hok kiba khraw ha ka jingpyntreikam ïa ka Jal Jeevan Mission (JJM) ha Manipur bad ka la dawa ïa ka jingtohkit ba la buddien da ka ïingbishar halor kaei kaba ka la batai kum ka “jingjah burom kaba khraw.”
Ka seng ka la kynnoh ba ki jingbym ïahap kiba ju jia man ka por ha kylleng ki distrik ki pyni ïa ka jingpyndonkam bakla ïa ka pisa paidbah kaba lah ban long, ka jingpynkylla ïa ki jingtip, bad ka jingbym don ka jingpeitngor da ki kynhun pyntreikam.
U MP ka Inner Manipur u A Bimol Akoijam haba ai jingkren ha ka jingïalang bad ki nongthoh khubor ha ophis treikam ka Congress ha Imphal u la ong, “Nga kwah ba ka jaitbynriew kan tip ba ka jingsniew kaba khraw ka jia hapoh ka Jal Jeevan Mission ha Manipur.”
U la ong ba watla ki jingkheiñ ba thikna ki pyni ïa ka jingkiew kaba pawnam hapoh kane ka skhim, ki jingshisha kiba don ha madan ki pynpaw ïa ka dur kaba pher bak-ly-bak.
Da kaba pynshong nongrim ïa ki jingtip jong ka sorkar, u Akoijam u la ong ba shwa ban sdang ïa ka JJM ha u Nailar 2019, tang 26,000 tylli ki longïing nongkyndong kumba 5.74 percent, ki don ïa ka um top. Ka sorkar ka kam ba la pyndap sa 3,33,539 tylli ki longïing naduh katei ka por, kaba pynlong ïa ka jingkheiñ baroh sha ka 3,59,459 tylli ki longïing, lane 79.59 percent na ki 4,51,619 tylli ki longïing nongkyndong jong ka jylla, haduh ka 28 tarik u Naitung, 2025.
U la bynrap ba T.1,202 klur la dep ban pynlut ha kane ka projek, ha kaba ka sorkar pdeng ka la nohsynñiang da T. 1,078.82 klur katba ka jylla da T.124.03 klur. Hynrei, ha ka jingleit jngoh ïa ki katto katne ki shnong ba kynthup ïa ka shnong Toubul, Nachou, Phubala, Patsoi Part-II, Kiyamgei, bad Yurembam, u Akoijam u la ïathuh ba ym shym la don wat kawei ruh ka longïing ka ban ïathuh ba ki ïoh umbam umdih na ka top ba la pyntreikam.
