Jowai, Risaw 09
U Kynmowanki Phawa ula khyrwit da ka hat-trick kaba la pynlong ïa ka Jalapang SC ba kan jop da 6-0 kol pyrshah ïa ka Wahshangiar ha ka lympung ïalehkai 1st Division Football Tournament ba la pynïaid da ka Thadlaskeiñ Sports Association (TSA) ha Multi Sports Complex Wahïajer ha ka sngi Palei.
Kane ka hat-trick jong u Kynmowanki ka la wan lyngba ki kol ba ula thep haka minit 14, 46 bad 69. Kiwei pat ki kol jong ka Jalapang la thep da u Hopeful Shullai tang hapoh 2 minit, Marvel Kyndait (16) bad u Nangroi Laloo (79).
Ha ka jingïalehkai kaba bud, ka Nongkhroh Mawsiang ka la pynliem ïa ka Evergreen SC da 5-2. Ïa ki kol ka Nongkhroh Mawsiang la thep da u Rio Myrboh ha ka minit kaba 10, Deibanskhem Kharsati (14 & 74), Sanwel Kharsati (26) bad Pyn-biangmi Kharsati (63). Katba ïa ka Evergreen SC la thep da u Teddy Bang (16) bad u Riskhem Shylla (53).
