Shillong, Risaw 09
Ka Khasi Hills Autonomous District Council (KHADC) ka la phah da ka ‘Show Cause Notice’ ïa ki ophisar ba pynmih ïa ka ‘notification’ kaba kdew ba ki nongtrei, nongsengkam bad ki nongshong dukan barit baria ki hap ban siew ïa ka khajna (professional tax) kumjuh ruh ka la pan jingpynshai hapoh hynñiew sngi.
U Chief Executive Member ka Khasi Hills Autonomous District Council (KHADC) u Bah Winston Tony Lyngdoh ha ka jingïakren sha ki nongthoh khubor ha ka sngi Palei u la pynshai ba ka ‘professional tax’ kam dei kaba dang thymmai, hynrei ka dei kaba la don lypa naduh u snem 2012 kaba ka Sorkar Meghalaya ka la aiti sha ki District Council ban lum ïa ki khajna na ki nongshong shnong bad ki nongtrei, kum ka Council ka donkam ïa ka khajna na ka bynta ka jingpyntyllun ïa ki kam jong ka Council.
U Bah Winston Tony Lyngdoh u la ong, “Nga ïohi ïa kito ki ‘notice’ ba la sam sha ki dukan ha ka 29 bad 30 tarik Nailur 2025, ha ka por ba ka seng ka dang bunkam bha ban ïakren ban ïa pynbeit ïa ki EM bad u CEM ba thymmai, namar ka jingrisaiñ noh u Bah Shemborlang Rynjah kum u CEM ka Council.”
U la ong ba ka EC ka kwah ban tip ïa ki ophisar ba leit sam ïa ka ‘notice’ khlem ka jingtip bad ka hukum jong ka EC ba la ïalam da ka Voice of the People Party (VPP). “Kane ka dei ba la don mano-mano ba shim kabu ha ka ban phah ïa ki ‘notice’ ha ka por ba ka EC kam treikam bha bad ha kane ka EC ba thymmai kan peit pyrman, ka la wad bniah ruh mano kita ki ophisar kiba la leh ïa kane bad la phah ‘Show Cause Notice’ ruh ïa ki ban ai jingpynshai hapoh hynñiew sngi”
Shuh-shuh u la ong ba halor ki ‘notice’ ba la dep sam sha ki dukan, sha ki nongtrei bad nongsengkam ka Council kan pynduh pyndam noh namar ba ka long be-aiñ khlem don ba phah ban leit sam ‘notice’.
U Bah Winston u la ong, ka ‘professional tax’ ka dei ka ban lum shisien shisnem, kaba mut kino-kino ki dukan lane kiba trei bad ba pynmih pisa hapoh ka T.50,000 ha ka shisnem kim donkam ban siew ïa kane ka khajna. Katba kito kiba la pynmih pisa T.50,000 haduh T.75,000 kin hap ban siew ïa ka khajna kaba long T.200, kiba ïoh T.75,000 haduh T.1,00,000 kin siew ïa ka khajna kaba T.300, kiba ïoh T.1,00,000 haduh T.1,50,000 kin siew khajna T.500, kiba ïoh T.1,50,000 haduh T.2,00,000 kin siew ïa ka khajna ba T.750, kiba ïoh T.2,00,000 haduh T.2,50,000 kin siew T.1000, kiba ïoh T.2,50,000 haduh T.3,00,000 kin siew ïa ka khajna kaba T.1250, kiba ïoh T.3,00,000 haduh T.3,50,000 kin siew ka khajna ba T.1500, kiba ïoh T.3,50,000 haduh T.4,00,000 kin siew T.1600, kiba ïoh T.4,00,000 haduh T.4,50,000 kin siew T.2100 bad kiba ïoh T.4,50,000 haduh T.5,00,000 kin siew T.2400 ka khajna.
U la ong ba kane ka jingbuhdor ka dei kaba la don naduh ki por ba kham mynshuwa, ym ka jingbuh ka EC kaba mynta.
“Nangne shakhmat ngi khmih lynti ba baroh ki nongtrei bad ki ophisar kiba don hapoh KHADC kin ai ka jingïatreilang bad ka EC bad lada phim don ka jingïatreilang na ka liang ka EC kam banse ban shim da ki sienjam kiba kham tyngeh,” la ong u Bah Winston.
