Khliehriat, Risaw 09
Ka Mulait United ka la ïoh ban khung ïa ka song pisa kaba T. 50 hajar tyngka ryngkat ka trophy hadien ba ka la rah ïa ka nam lahduh ha ka lympung ïalehkai ‘4th Money Knock-out Football Tournament 2025’.
Kane ka nam jop ka la wan hadien ba ka la pynliem noh ïa ka Jalaphet Thana Mulait SC da 3-1 kol ha ka jingïakhun phainal kaba la long ha ka 7 tarik mynta u bnai ha madan ïalehkai Jalaphet Bri Sutnga.
Ka jingïalehkai ka la long kaba shongshit bha da ka jingwan sakhi ki spah ngut ki riew ïeit phutbol katei ka thaiñ. Ka Mulait United ka la ïoh ban pynkhih jar ha ka minit 23 lyngba u Ripil Bareh, kumjuh u Thomas Dkhar (55) bad Owan-ki Pajuh (70). Hynrei na ka liang ka Jalaphet Thana Mulait ka la pynphai kylla lyngba u Pong Sumer ha ka minit 50.
Ïa ki khusnam la sam da u Bah Defender Pakem kum u kongsan ha ka jingïadonlang u MDC ka thaiñ u Bah Krison Langstang ha kaba nalor ka Mulait United, ka Jalaphet Thana Mulait ka la ïoh T.20 hajar tyngka ryngkat ka trophy.
Ha katei ka sngi la ïadonlang ruh ki nongïalam bad ki dkhot nongkitkam ka Moolait Bri Sutnga ba kynthup ïa u President Bah S. Nongtdu bad u Secretary Bah D Syrti.
