Shillong, Risaw 09
Ka Pohkseh SC ka la wanphai da ka jingjop ha ka First Division Football League 2025 ba la pynïaid da ka Shillong Sports Association (SSA), hadien ba ka la pynliem noh ïa ka Ryntih SC da 3-0 kol ha ka sngi Palei ha SSA Stadium kaba ha First Ground, Polo.
Kane ka nam jop ka la wan urlong lyngba u Badonkupar Shadap, Shiningstar Nongdhar bad u Reinjoywell Wartde na ka bynta ban pynlong ïa katei ka klob ban khur ïa ki lai point na ki ar sien ïakhun.
Kine ka paw kine ki kynhun ki dei kiba la mad ïa ki jingshah rem ha ka jingïalehkai ba la lah. Ka Pohkseh ka la shah rem da 6-0 kol ha ka Nongkseh, katba ka Ryntih ka la shah rem ha ka Nongkrem da 3-1 kol.
Haba phai sha kane ka jingïakhun, baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol ha ka kylla step. Dei ha ka kylla miet, ka Pohkseh ka la ïoh ban pynkhih jar lyngba u Badonkupar ha ka minit kaba 51. Kumjuh ïa ka kol ba-ar la thep da u Shiningstar (59) bad u Reinjoywell (67). Haduh kaba kut ka jingïalehkai ka Ryntih kam shym la lah ban pynphai bad ka la mad ïa ka jingshah rem kaba ar ha kane ka lympung.
Ka jingïalehkai ha ka sngi Thohdieng kan long hapdeng ka Nongkseh SC pyrshah ïa ka Lawsohtun SC ha ka por 1:30 mynsngi, katba ha ka SPL ka Langsning FC pyrshah ïa ka Laitkor SC ha ka por 4:30 janmiet.
