Shillong, Risaw 09
U samla Ferick Kit-boklang Syiemlieh un pynkhreh ban leit shim bynta ha ka ka International Vedanta Delhi Half Marathon 21km Race ka ban long ha nongbah Delhi ka ban long ha ka sngi U Blei (12 tarik).
Une u samla uba na Mawtawar un ïasoh lang bad kiwei pat ki nongmareh ka Jylla ha katei ka jingïakop ka ban sdang mareh na Jawaharlal Nehru National Stadium, Delhi. Kane ka dei ka jingmareh half marathon kaba heh duh ha ka ri ba la pynïaid da ka Procam International Authority bad kaba la ithuh da ka Association International Marathons (AIMS).
Te kumta hashwa ba kin mih na ka nongbah, na ka liang u Bah PT Sawkmie, MLA barim ka Mawlai ha ka sngi Balang, u la ai ka jingkitbok kitrwiang ryngkat ka kyrkhu kyrdoh ïa u samla Ferick ba un lah ban ïalehkai bha ha katei ka jingïakop.
Haba ai jingïarap u Bah Sawkmie u la ong, watla um long eiei shuh, hynrei ha i bor barit u pyrshang ban ïarap ïa kiba donkam ïa ka jingïarap bad ha kajuh ka por u pynpaw ïa ka jingkyrmen ba u Ferick un ïoh ïa ka jingjop ha kane ka jingleit mareh jong u ha Delhi.
Ha kajuh ka por u Bah Sawkmie u pynpaw ruh ba un ïai bteng ban shakri ïa ki paidbah bad ha i bor barit u long la kloi ban pyrshang ïarap ïa kiwei ruh kiba donkam ïa ka jingïarap.
Ha kawei pat ka liang, u kpa jong u Ferick u Bah Badon Tham u la pynpaw ba u Bah Sawkmie, kumba u ju thrang, ju leh burom, ju ïarap ïa kiba bun ki khun samla ka Mawlai ha ki jingïalehkai bapher-bapher naduh ki por mynshuwa, mynta ruh u dangïai bteng.
