Jowai, Risaw 10
Ka Dorbar Shnong Lapangap ha ka step 10 tarik Risaw, ka la lum ïa ka Dorbar bad ai ka jingbthah ïa ki nongshong shnong jong ka shnong Lapangap ban sangeh noh shuwa ïa ka jingleit ot kba sha ki pynthor kba kiba don kham pajih na shnong tad haduh ban da ïoh ïa ka jingbthah na ka Sorkar Meghalaya.
Haba ïakren bad u Waheh Shnong ka Lapangap, u Bah Deimonmi Lyngdoh halor ka jingjia ïakynad kaba la jia ha ka 9 tarik Risaw, u la ong ba ka jinghiar ot kba ki Lapangap, ka dei da ka jingpynbeit hapdeng ki bor pynïaid distrik ka West Jaiñtia Hills District bad ka West Karbi Anglong District ba ki pulit jong ka Assam bad ka Meghalaya kin ai jingïada ïa ki haka por ba ki leit ot kba sha ki pynthor markhap bad ka shnong Tahpat.
U la ïathuh katba ka jingot kba ka dang ïaid, kata tang hapoh 10 minit, ki Karbi na ka shnong Tahpat ki la wan ban pynthut ïa ka jingot kba da kaba ther da ki jri siat sim.
U la ong ruh ba ki pulit Assam kim shym la lah satia ban tehlakam ïa ki nongshong shnong Tahpat ban ym pynthut ïa ka jingot kba namar ba ki nongshong shnong Tahpat ki nud ban tur wat shaduh ki pynthor ban hiar thma ïa ki pulit Meghalaya bad ki nongshong shnong Lapangap.
U la pyntip ba hadien ka jingbym ïoh lad ban ot kba, la bthah ïa baroh ki nongshong shnong ban leit phai noh sha la ki jong ki ïing ki sem.
Halor ka jingïap jong uwei u Karbi, u la ong ba na ka liang ka Dorbar Shnong ka khlem ïoh jingtip eiei, hynrei la ïoh jingtip ha ka por janmiet lyngba ki khubor.
U Bah Lyngdoh u la pynpaw ruh ka jingsngewdiaw namar ki nongshong shnong ka Lapangap kim don da kiwei ki lad ki lynti ban pyndap pynbiang ïa ka ïing ka sem lait na kaba rep kba kba baroh shisnem lynter.
Lada ka Sorkar ka shim por ban ai jingbit ban leit ot kba, ym banse ki kmie ki kpa kin hap ban pynpep skul ïa ki khun ki kti kiba leit pule sha sor bad khapsor, la ong u Bah Lyngdoh. Shuh shuh u la ong ba ka Dorbar Shnong Lapangap borabor ka ju kwah ïa ka jingïasuk kum ha ki por kiba mynshwa.
Ki nong shong shnong ka Lapangap ki kloi ban wan sha ka jingïakren ïasuk ha kano-kano ka jaka ne Committee, hynrei kin ym pdiang pat ba ha ka jingïakren ïasuk, ki Karbi kin buh da ki kyndon ïa ki. Ka jingïasuk kan dei beit tang halor ka shongsuk shongsaiñ.
Lah ban kdew ba ha ka 9 tarik Risaw, uwei u nongshong shnong jong ka Shnong Tahpat ula duh ei la ka jingim katba bun ngut ki nongshong shnong Lapangap hapoh West Jaiñtia Hills District bad Tahpat ki la mynsaw ha ka jingjia ïakynad khappud hapdeng ka Shnong Tahpat bad Shnong Lapangap.
Kane ka jingïakynad ka jia hadien ka jinghiar ot kba ki nongshong shnong ka Lapangap sha ki Pynthor kiba don markhap bad ka shnong Tahpat, hapdeng ka jingpyrkhing pahara ba la pynbiang da ka tnad pulit ka Meghalaya bad Assam. Katba dang ïaid ka jingot kba, ki nongshong shnong Tahpat ki la sdang ban pynthut ïa katei ka jingot kba da kaba ther da ki jri siat sim ïa ki nong Lapangap bad ki nong Lapangap ruh ki la pynphai markylliang.
Ha kane ka jingïather jri markylliang ka la don ruh ka jingkawang lyer pynsat khmat da ki pulit Meghalaya bad Assam ban pynpra ïa ki paidbah na baroh arliang.
Ha katei ka jingïather mar kylliang uwei u nongshong shnong Tahpat uba la tip kyrteng kum u Orivel Timung u la duh ei la ka jingim.
Khnang ban pyntikna ban pynneh ïa ka shongsuk shongshngaiñ, ki bor pynïaid District jong ka West Jaiñtia Hills District ka la pyntreikam da ka Section 163 BNSS da kaba pynjari da ka korphiw miet naduh 6:00 baje janmiet haduh 10:00 baje mynstep ha ki thaiñ khappud jong ka shnong Lapangap, West Jaiñtia Hills District.
