Mawkyrwat, Risaw 10
Ka Hynñiewtrep National Youth Front ( HNYF) South West Khasi Hills District ryngkat ka seng HNYF Sengkmie ha ka 21 tarik kan pynlong ïa ka marathon kum ka dak ka jingrakhe ïa ka lyngkhuh sngi ïap kaba 37 jong u Wickliff Syiem bad ka jingdap 30 snem jong ka seng.
U President u Bah Shainingtar Wanñiang u la wer ïa ki nongmareh marathon kiba don ha kylleng ka ri khasi ban wan ban ïashim bynta ha katei ka sngi. Ka seng ka la pynshai ruh ba ha katei ka sngi kan ym don ka jingshim bai rung ïa ki nongwan ïashim bynta, lait noh tang ki kot ki sla ban pynshisha katkum ka rta (snem) kaba ki la don.
Ha katei ka jingïakop mareh ki nongïashim bynta kin don naduh ka 50 snem shajrong, nangta senior bad junior, bad ka jaka ban pynlong kan sdang na 3lad PWD Road syndah ka IB ha ka por 6 baje mynstep, kin don ruh ki khusnam na ka bynta ki nongjop kaba nyngkong, ba-ar bad balai ryngkat ki takma. Ïa ki jingtip ba kham bniah ki lah ban phone ha ki number 6009323739, 8837040862, 9366129132 & 9863972747.
