Shillong, Risaw 10
Ka India bad ka Singapore ki la ïakhaid da mar shi kol ha ka jingïalehkai ban shah jied sha ka lympung ïalehkai Asian Cup 2027.
Ka kynhun ïalehkai ka Ri kaba don tang 10 ngut ki ‘ranglehkai ha kane ka jingïakhun ka la donbok ba ka lah ban pynïakhaid da 1-1 kol bad ka Singapore ha kaba ym idon jingkyrmen bad ym shym poi pyrkhat, kane ka la long ka jingbakla bad jingbym lehbha ka kynhun pyrshah ha ka por ba jan jong kane ka jingïalehkai.
Ka Singapore ka la synshar ïa ka jingïalehkai baroh kawei da kaba bat palat 60 percent ïa ka bol bad ka la pynlong ïa ka kynhun ïada jong ka India ban bunkam da kaba ai bol stet, kaba thikna, bad bun ki jingïalehkai ban ïakhun pyrshah.
Ka Singapore kaba la dei ban jop ha kane ka jingïakhun lada kam shym la pynsyrwa kai ïa ki ar tylli ki kabu hadien ba ka India ka la shah pynduna sha ka 10 ngut. Hynrei ka Singapore ka la siew ïa ka dor namar ba kam shym lehkai bha bad don ruh ka jingbakla.
Ka Singapore ka la lah ban thep kol ha ka por ba la pynsangeh ïa ka kylla step. Uwei u rangïalehkai dien jong ka Singapore u Fandi u la ïoh ban thep kol ha ka minit ba 45+1. Katba ka India ka la lah ban thep kol ha ka minit ba 90 lyngba u Rahim Ali.
Mynta ka India ka la ïoh ar poiñ na ki lai tylli ki jingïakhun hadien ba ka la ïakhaid pyrshah ïa ka Bangladesh da 0-0 kol bad shah rem noh da 0-1 kol pyrshah ha ka Hong Kong ha ka jingïakhun bala dep. Ki dang don ha ka jingeh ha ka jingpyrshang jong ki ban rung sha ka lympung ba kongsan ha u snem 2027. Katba ka Singapore ka ïoh khur san poiñ hadien ka jingïakhaid ha ka sngi Palei.
Tang ka kynhun kaba ha khlieh duh ha ka kynhun ka lah ban don bynta ha ka jingïakhun na ka bynta ka AFC Asian Cup 2027.
