Shillong, Risaw 10
U Symbud Myntri Rangbah ka Jylla ba khmih ïa ka tnad ki kam pynroi sor, Bah Sniawbhalang Dhar ha ka Sngi Thohdieng u la pyntip ba ka Sorkar ka dang pynithuh ïa katto-katne ki jaka halor ka jingthmu ban pynkynriah ïa ki 342 tylli ki longïing kiba shong ba sah ha Them Ïew Mawlong.
Haba kren sha ki lad pathai khubor, u Bah Dhar u la ong ba ki jingïakren ki dang ïaid hashuwa ban pynbeit ïa ka jaka bathymmai.
“Ngi don ha ka kam, bad phin sa tip ynda ngi la rai,” u la ong.
Haba ïadei bad ki jingïakren kiba dang ïaid shakhmat bad ka tnad kam ïada ri ka Sorkar Pdeng, u Bah Dhar u la pynpaw ba kane ka kam ka dang don hapdeng ka jingïakren.
“Ngi dang ïakren bad ki”, u la ong.
Haba pynpaw ba kane ka mukotduma ka dang sahteng ha ïingbishar, u Symbud Myntri Rangbah u la ong, “Hooid, ka mukotduma ka dang don ha ïingbishar, bad ngi dang leh ïa la ka jong ka kam kum ka Sorkar Jylla (ban pynsted ïa ka jingpynkynriah).”
Na ka liang u Bah Dhar u la pynpaw ïa ka jingkyrmen ba ïa katei ka jingeh yn sa lah ban ïapynbeit lang da ka jingïasngewthuh jingmut, wat hapdeng ka jingbishar kaba dang ïaid ha ïingbishar.
“Ngi kwah ban rai lang da ka jingsngewthuh-jingmut, watla kane ka kam ka dang sahteng ha ïingbishar. Kyrmen skhem, ngi dei ban lah ban pynbeit ïa ka. Lehse ngin shim por katto-katne, hynrei ngim shong kli-kti; ngi don ha ka kam, bad ngi shimkhia bha ïa kane ka kam,” u la pyntikna.
