Shillong, Risaw 10
Ka Chairperson ka Meghalaya State Commission for Women, ka Kong Iamonlang Syiem ha ka 10 tarik u Risaw 2025, ka la leit ban sngewlem ïa ka ïing ka sem jong u heprit Kyrshanbor Kharmudai, ha Nongrah Lummarboh, kaba dei ka sngi leit ontep ïa utei u heprit.
Haba kren sha ki lad pathai khubor, ka Kong Iamonlang ka la pynrem jur ïa ki briew kiba donkti ban leh ïa kum kine ki jait kam ban shim ïa ka jingim jong ki heprit.
Ha ka por ba dang kren sha ki lad pathai khubor, ka Kong Iamonlang ka la jaw ki ummat bad pynpaw ka jingsngewsih halor ka jingjia kaba la wan jia ïa u heprit Kyrshanbor uba dang lui-lui bad uba dang dei ka por ban san.
Ka Kong Iamonlang ka la pynpaw ruh ka jingsngewkhia halor ka jingkynrei ki kam sniew jong ka jingshah pynïap ïa ki khunlung ki khynnah ha kine ki sngi ba mynta bad ong ba kane ka la ktah ïa ka jaitbynriew baroh khoit.
“Baroh khoit mynta ki la tieng lut ban phah ïa ki khunlung shabar, namar kam don shuh ka jingshngaiñ. Kane ka dei kaei-kaei kaba la ktah ïa ka jingsngew, ka ktah ïa ka jingmut jingpyrkhat ïa baroh bad ngin hap wad ïa ki daw,” la ong ka Kong Iamonlang.
Shuh shuh ka la ong ba ka imlang ka sahlang, ki kmie ki kpa, bad ka Sorkar kin hap ban ïatreilang ban wad ïa ki daw ba kum kine ki jingsniew ki ïoh ban rung hapoh ki shnong ki thaw. Nalor kata, ka la ong ba kane ka long kum ka jingpyn kyndit bynriew ïa baroh khoit ba kin hap ban peitbniah bad ban phikir bha, ba kumno kin sumar ïa ki khun kiba dang rit.
“Ngam kwah ban kren shibun hynrei na ka liang ka Commission ka pynrem jur ïa kane ka jingjia. Ngi kyrmen ba kin ïoh noh ïa ki briew kiba leh ïa kane ka kam ba ka Jylla kan shongsuk shongshngaiñ,” la bynrap shuh-shuh ka Kong Iamonlang.
