Shillong, Risaw 10
Ka Hill Farmers’ Union ka la ujor sha u Superintendent of Police ka East Khasi Hills District, u Bah Vivek Syiem halor ka jingshah kren beiñ ka Kong Kmoiñ Wahlang ha ka briew ba pyndonkam ‘social media’ bad dawa ba katei ka briew ka dei ban panmap.
Haba ïakren bad ki Nongthoh Khubor, u Bah Allfondbirth Kharsyntiew u ba dei u General Secretary ka Hill Farmers’ Union u la ong ba, Ka Kong Kmoiñ ka don shibun ki khun bad katei ka briew ba pyndonkam ‘social media’ kaba la tip kum ka ‘twisted_koala’ ka la kynthoh da kaba thoh ha ki rynsan social media, da kaba ong, “Ka kha ïa ki khun kum ka khnai, khlem ka jingtip.”
U Bah Allfondbirth u la ïathuh ba halor kane ka HFU ka la phah jingthoh sha u SP ka East Khasi Hills District, u Bah Vivek Syiem ban phah wad ïa katei ka briew kaba la kren beiñ ïa ka Kong Kmoiñ bad katei ka briew ka dei ban panmap mardor.
U la ong ba ka HFU ka pynrem jur ïa katei ka briew kaba kynthoh ha rynsan ‘social media’ khlem da tip bha ïa ka jingim bad ki kam jong ka Kong Kmoiñ ba 76 snem ka rta, kaba dei ka nong mareh marathon kaba la rangbah bha ha ka Jylla bad ba la wanrah nam wanrah burom ïa ka Jylla Meghalaya.
“Kum ka jaitbynriew ka dei ban ïengtylli ba ym dei ban ailad ïa kum kine ki briew ba kin niewbeiñ ïa ki longkmie khamtam ïa ka Kong Kmoiñ kaba la rangbah ka rta hynrei ka dang ïashim bynta ha man la ka jingmareh marathon ha kylleng ka Jylla, ha ka Ri bad wat shabar Ri ruh kumjuh” la ong u Bah Allfondbirth.
U Bah Allfondbirth u la ong, halor kane u SP u la kular ban shimkhia ban leh ïa kaba donkam bad bynrap ba lada katei ka briew kam panmap, ka tnad pulit ka dei ban pynngat ïa katei ka briew katkum ki kyndon aiñ ka ‘social media’.
U la kyntu ruh ïa ka Sorkar Jylla, ki seng longkmie, ki Sports Association ba kin wan sha khmat ban ïasnohkti lang bad ka Hill Farmers’ Union ban pynrem halor kane ka jingjia, ba ki briew kiba nabar kin kren beiñ ïa ki briew ka Jylla khamtam ïa ki briew kiba la wanrah nam bad burom ïa ka Jylla Meghalaya.
