Shillong, Risaw 10
U Bah Mariahom Khar-krang nongaiktien ka Bharatiya Janata Party (BJP) u la ong ba kum ka party ka pynrem jur ïa ki briew kiba la shim ïa ka jingim jong u heprit Kyrshanbor Kharmudai uba na ka Shnong Nongrah Lummarboh.
Haba kren sha ki lad pathai khubor ha ka 10 tarik u Risaw 2025, u Bah Kharkrang u la ong ba ka jingjia ïap i heprit Insaphira Lyngdoh Mawnai, ka dang ïaid tang kumba shi bnai eiei hynrei mynta pat la jia sa ka jingïap jong u heprit Kyrshanbor kiba dei na ka juh hi ka shnong.
Haba kylli u la ong, ba kam dei eh ka jingsynjor jong ka aiñ ba ka jingjia shah pynïap ka ïai jia hynrei ki paidbah ruh ki dei ban ïatreilang bad ki bor pulit khnang ba kine ki jingjia kin nym wan jia shuh.
“Kane ka jingjia shah pynïap ki ar ngut ki heprit na Nongrah ka paw ba ka Nongbah Shillong kam shngaiñ shuh,” u la ong.
U la ong, “Ngi la shaïong kum ka Jylla ban ïohi ïa kum kine ki jingjia, namar shi bnai mynta ka dang ïaid ka la jia biang kumne.
U Bah M.Kharkrang u la kyntu ïa ki paidbah kiba don jingtip ïa ki briew kiba leh ïa kane ka kam ban shim ïa ka jingim ki heprit ba kim dei ban tieng hynrei kin wan shakhmat ban ïathuh sha ki pulit.
“Kam dei eh ka jingsynjor jong ka aiñ, hynrei ka tnad pulit ruh haba ka la dep ban lap ïa kita ki briew, ka dei ban pyndep ïa ka case haduh khyndai phew sngi. Ki dei ban peit ruh ba kine ki briew kin nym lait jamin, khnang ba kin ïoh ïa ka jingpynsaja kaba kham tyngeh,” la ong u Bah Kharkrang.
Nalor kata, u la ong ba bunsien kum kine ki jingjia ki briew ki lait jamin namar ba ka slem palat ka jingtohkit kaba pynlong ïa ka Ïingbishar ruh ba kan pyllait noh ïa ka bill bad kan nang pynkthang shuh-shuh ïa ki bahaïing.
Kumta u la ong ba ki pulit kin tohkit bha khnang ba ki briew kiba leh ïa kine ki jait kam pyntriem kin nym ïoh jamin kloi bad ban pynshitom da kaba tyngeh.
